E Méindeg de Moie war de Stater Schäffen an CSV-Deputéierten eisen Invité vun der Redaktioun.

D'Qualitéit vum ëffentleche Raum ass entscheedend fir d'Liewensqualitéit an enger Stad. Wann een an engem Quartier een ëffentleche Raum hätt, deen attraktiv an aluedend wier, da géingen d'Leit sech gären dobaussen ophalen, da wier Liewen do an doduerch géing d'Sécherheetsgefill gestäerkt ginn. Deemno wär de Reamenagement vun der Paräisser Plaz op der Stater Gare, déi e Samschdeg ageweit gëtt, e ganz wichtege Schratt fir d'Sécherheet op der Stater Gare. Dat sot den éischte Stater Schäffen an CSV-Deputéierte Serge Wilmes e Méindeg de Mueren. Hie war eisen Invité vun der Redaktioun.

D'Gare wier déi lescht 2 Joer mat ville Schwieregkeete confrontéiert gewiescht an dofir wier et fir de Quartier wichteg, dass elo nees eng schéin ëffentlech Plaz géing entstoen. Et ginn awer och aner Plazen am Garer Quartier, déi solle reamenagéiert ginn. D'Gemeng hätt zum Beispill den ieweschten Deel vun der Stroossbuerger Strooss provisoresch reamenagéiert, mä op Dauer soll do eng Zone de rencontre entstoen, wou Prioritéit ass fir d'Foussgänger a wou och vill Terrasse solle kënnen entstoen.

Biergerbedeelegung fir d'Place de la Gare

Och d'Place de la Gare, wou aktuell e grousse Chantier wier, deen d'Leit géing verdreiwen an d'Dealeren unzéien, soll nei belieft ginn. D'Plaz gehéiert den CFL, ma d'Gemeng hätt schonn eng Demande gemaach, fir d'Place de la Gare dierfen nei ze beliewen. Den Transportminister hätt Pläng fir e groussen ënnerierdesche Vëlosparking do z'installéieren, ma d'Gemeng hätt selwer Iddien a wéilt virun allem d'Bierger dorunner bedeelegen, wéi bei der Paräisser Plaz, an net vun uewen erof decidéieren, fuerdert de Serge Wilmes.

Quo Vadis Abrigado?
Den Abrigado ass eng Struktur, déi vum Gesondheetsministère geréiert gëtt. Dofir war am Mäerz eng Reunioun mat der Santésministesch fir iwwer d'Zukunft vum Zentrum fir Drogenhëllef ze diskutéieren. Den Zentrum misst nei gebaut ginn, méi dezentral, ma d'Erausfuerderung wier erauszefanne wou. D'Stad Lëtzebuerg wéilt och onbedéngt eng Struktur fir Fraen déi Drogenofhängeg sinn, well dës dacks och nach vun hiren Zuhälter géingen ofhänken. Fir se do erauszekréien, hätt een och schonn eng Iddi fir eng Plaz am Kapp, ma dat wier nach net definitiv decidéiert, esou den éischten Stater Schäffen.

Commerce: Nei Iddie stäerken an nei Offere schafen

Wat de Commerce ugeet, sou géingen et vill Schwieregkeete ginn, ma dës wären net eleng op ze héich Loyeren zeréckzeféieren. Dorop kéint een als Gemeng och net wierklech awierken. Et bräicht een awer e liewege Commerce, dowéinst géif d'Stad de Geschäfter hëllefen. Dës hätte besonnesch op der Gare staark ënnert dem Tram-Schantje gelidden. Do hätten d'Butteker besser missen ënnerstëtzt ginn, fënnt eisen Invité.
Der Gemeng gehéieren elo schonn eng 40 Stater Geschäfter, Restauranten an Caféen an et wier een och op de Wee gaangen eng Rei Lokaler elo mol provisoresch ze lounen, souwuel op der Gare, an der Aler Avenue hätt een e Pop-Up Store gemaach, wéi och an der Uewerstad, wou een der mëttlerweil 5 Stéck hätt. Et wier wichteg nei Offeren ze schafen, déi d'Leit unzéien an nei Iddien ze testen, sou de Serge Wilmes. Mä natierlech wier et och net d'Léisung all d'Butteker als Stad Lëtzebuerg ze lounen an duerno ze verlounen. Do missten déi privat Acteuren och Verantwortung iwwerhuelen, sou den éischte Stater Schäffen.  

Politbarometer an d'Fro vum CSV-Spëtzekandidat

Op de Politbarometer ugeschwat, do sot den Deputéierte Serge Wilmes d'CSV hätt sech gutt gehalen. Och wann een als Oppositioun net déi nämmlecht Tribün géif an der Ëffentlechkeet kréie wéi d'Regierung. 6 Regierungsmemberen, also quasi een Drëttel, géingen hannert der CSV an dem Klassement leien an do misst ee sech Froe stellen. Nieft der Gestioun vun der Kris wären d'Haapt-Hausaufgaben net gemaach ginn, nämlech a punkto Logement.

Wat säin eegene Score ugeet, wou den Deputéierten 3 Prozentpunkte par Rapport zum November verléiert, fënnt de Politiker, dass dat zu den normale Variatioune géing gehéieren. Heiansdo géing et erop an heiansdo erof goen. Ob säi Score kéint u sengen Aussoen am Kontext mam fréieren CSV-President Frank Engel leien, dozou wollt de Serge Wilmes näischt soen. Dat Kapitel wier elo ofgeschloss an et soll een dat hannert sech loossen.

A punkto Walen, soll ee sech elo fir d'éischt mol op d'Gemengewalen am Juni 2023 fokusséieren, well een do eng gutt Aarbecht kéint maachen, esou de Stater Schäffen. Eréischt duerno soll een d'Fro vum Spëtzekandidat klären. Hie wär op alle Fall motivéiert bei de Gemengewale fir d'CSV als Spëtzekandidat an der Stad unzetrieden, sou de Serge Wilmes.

Invité vun der Redaktioun: Serge Wilmes

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.