E Mëttwoch de Moie war de Bob Ritz vun der Stëmm vun der Strooss eisen Invité vun der Redaktioun.

Et kéint ee verstoen, datt Leit, déi am Stater Garer Quartier wunnen, "sech onwuel fillen, wa se den Drogenhandel a Prostitutioun an d'Kriminalitéit, déi dat mat sech zitt, virun der Dir hunn". Dat sot de Bob Ritz, Spriecher vun der Stëmm vun der Strooss, déi zu Hollerech hiren Haaptsëtz huet, de Mëttwoch de Moien hei op RTL. Dee Problem géing et senger Meenung no awer an all Garer Quartier vun enger Groussstad ginn. Wann een d'Leit géing verdrängen, da géing dee Problem och just op enger anerer Plaz entstoen. Angscht hätt hie selwer net an et géingen och net just Krimineller op der Gare ronderëm lafen. "Et si Leit, déi Problemer hunn, deenen et net gutt geet an déi Leit brauchen Hëllef", sou de Bob Ritz. Hie mengt, iert ee Kriminalitéit bekämpft, soll een Aarmut bekämpfen.

Zur aktueller Situatioun vun de Leit ouni Daach iwwert dem Kapp sot de Spriecher vun der Stëmm: Wéinst de Restriktiounen huet de Leit, déi keen Daach iwwert dem Kapp hunn oder eleng liewen, de soziale Kontakt gefeelt. Souwuel mat anere Leit ewéi mat Educateuren. De Bob Ritz sot, elo géing et awer e bësse besser goen an d'Zil wier et, dee Lien erëm hierzestellen. D'Wanteraktioun war ëm 3 Méint bis op den Dag vun e Mëttwoch verlängert ginn, wat "vill entlaascht" hätt. Elo, wou d'Wanteraktioun eriwwer ass, wäert d'Stëmm vun der Strooss erëm méi Schlofsäck verdeelen an d'"Kleederstuff" géing erëm méi aktiv ginn. D'Leit, déi et brauchen, wäerten och kënnen eng Dusch bei d'Stëmm huele goen an den Dokter besichen. De Bob Ritz huet awer och annoncéiert, datt am Juli Seancë bei der Stëmm zu Hollerech an zu Esch wäerten organiséiert ginn, fir datt Leit ouni Daach iwwert dem Kapp kënne géint de Covid geimpft ginn. Bis ewell hätten eng 60 Leit bei der Wanteraktioun de Vaccin kritt, mee dat wiere se net all.

De Spriecher vun der Stëmm huet sech de Mëttwoch de Moien iwwerdeems iwwert "immens vill Solidaritéit" vu Säite vun den Donateuren d'lescht Joer gefreet. "D'lescht Joer koum ganz vill eran a mat deene Suen gi Sortien organiséiert, zum Beispill an den Zoo vun Amnéville oder eng Soirée op der Schueberfouer, wann déi ass", sou de Bob Ritz. De gréisste Projet vun der Stëmm ass aktuell d'"Schweessdrëps 2", deen zu Suessem soll entstoen. Do solle 500 Tonne Liewensmëttel vum Auchan verschafft ginn. Donieft sollen do d'Kleeder vun de Sportveräiner aus dem Süde vum Land gewäsch ginn. Dem Bob Ritz no géingen do 50 weider Aarbechtsplaze fir Leit geschaaft ginn, déi a professioneller Reinsertioun sinn. Weider Done wieren awer wéi et heescht fir de Projet néideg.

De leschten Zuele vum Statec no liewen hei am Land 1,2% vun der Populatioun "en situation de privation materielle sévère", dat heescht 1,2% leiden ënner Aarmut. Zanter den 2000er Jore louch deen Taux meeschtens tëscht 1 an 2%, mee d'Land ass gewuess an de Bob Ritz huet confirméiert, datt ëmmer méi Leit op der Strooss liewen. Zum Hannergrond vun den defavoriséierte Leit hei am Land sot hien, zu Esch hätt d'Stëmm haaptsächlech mat eelere Lëtzebuerger ze dinn, deenen de soziale Lien géing feelen. An der Stad wier et eng aner Populatioun, mee och do wiere Lëtzebuerger, Portugisen a Rumänen dobäi. Am Ganze kéime 4.000 Leit bei d'Stëmm an et wieren 110 Nationalitéiten dobäi. Op der Strooss sinn, kéint senger Meenung no all Mënsch geschéien, deen e Schicksalsschlag erlieft oder keen huet, dee sech ëm ee këmmert. "Dat sinn net just Ofhängeger oder Krimineller, déi op der Strooss liewen", sou nach de Bob Ritz.

Invité vun der Redaktioun: Bob Ritz

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.