En Donneschdeg de Moie war d’Presidentin vun der Chamber-Budgetskontrollkommissioun an d’CSV-Deputéiert eis Invitée vun der Redaktioun.

D’Gestioun vun der Covidkris misst spéiderhin duerch eng Chamber Spezialkommissioun ënnert d’Lupp geholl ginn. „Mir sinn op jiddwerfalls Demandeur“, sou d’CSV-Deputéiert a Presidentin vun der Chamber Budgetskontrollkommissioun Diane Adehm en Donneschdeg de Moien hei op RTL. Nieft de punktuellen Analysen, déi aktuell preparéiert ginn – de Rapport vum Jeannot Waringo iwwert d’Alters- a Fleegeheemer an dem Rapport vum Rechnungshaff iwwert de Large Scale Testing – missten och déi aner Mesuren analyséiert ginn. D’Diane Adehm huet betount, datt wann och Consultante  bei esou Analyse bedeelegt wieren, déi Consultanten net bei iergendenger Task Force dobäi waren.

D’CSV hätt „ni kontestéiert, datt et soll kaschte wat et kascht“ well et ëm Mënscheliewe geet, sou d’Diane Adehm. Wann d’Kris bis ofgeschloss wier, misst awer e Bilan gezu ginn. Hirer Meenung no misst een iwwerpréiwen, wéi d’Decisioune geholl goufen, wéi vill Suen ausgi gi sinn oder nach ob d’Prozeduren agehale goufen, ënnert anerem wat d’Ausschreiwungen ugeet. Nieft der LSAP freet also och d’CSV eng Spezialkommissioun, fir Léieren aus der Krisegestioun ze zéien.

Sondagen „entspaant“ kucken

Dat relativ schlecht Resultat vun der CSV an de Sondagen, op en neits just 17 Sëtz wa muer Wale wieren, dat kuckt d’Diane Adehm „méi entspaant“. An hiren Ae wier ee mat manner ewéi 2.000 Leit déi gefrot goufen, wäit ewech vun der gesamter Wielerschaft, a bis déi nächst Wale wieren och ëmmerhin nach zwee Joer. Déi 26 Sëtz vun 2009, dat wier exzeptionell gewiescht. Mat méi Parteie wier d’politesch Landschaft méi zersplittert. Géingen d’Resultater vum Sondage sech 2023 materialiséieren, da wier keng Koalitioun zu zwee méi méiglech. D’Diane Adehm huet dat bedauert: „Virdrun huet ee missen zu zwee e Kompromëss fannen, elo sinn et eben dräi Parteien, déi mussen e Kompromëss fannen“. Déi aktuell Dräierkoalitioun géing weisen, datt bei dräi Parteien de klengste gemeinsame Nenner géing geholl ginn „mam Resultat, datt dacks net vill dobäi erauskënnt“.

Ugeschwat op de Renouveau bei der CSV an en eventuellen Depart vun den Deputéierten Ali Kaes a Jean-Marie Halsdorf sot d’Diane Adehm, si hätten e Mandat kritt, an et wier un hinnen esou eppes ze decidéieren.

Invité vun der Redaktioun: Diane Adehm

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.