E Freideg de Moie war den neie President vun der Fédération des Artisans eisen Invité vun der Redaktioun.

D’Rentabilitéit am Handwierk leit wéinst dem Manktem u qualifizéiertem Personal a wéinst ëmmer méi administrativen Oploen. Dat sot den neie President vun der Handwierkerfederatioun, den Ernest Pirsch e Freideg de Moien hei op RTL. An der Moyenne géifen eng 1.800 Leit eng Léier maachen. D’Handwierk misst sech net schummen: d’Paie wiere gutt. Mä „d’Präisdeierecht vum Logement kënne mir net kompenséieren, andeems mer d’Paien ëmmer méi héich maachen, well da si mer guer net méi rentabel“, esou den Ernest Pirsch.

D’Betriber géinge Leit an d‘Groussregioun siche goen, mä de Loyer wier hei am Land enorm héich an e grousse Problem. D‘Regierung misst méi determinéiert handelen, mä et géing senger Meenung no u Courage feelen an d‘Ministèrë géinge sech an de Féiss stoen. Dem President vun der Handwierkerfederatioun no misst méi dicht a méi an d’Héicht gebaut ginn, mä awer och de Bauperimeter erweidert ginn. De Logement misst zur Prioritéit ausgeruff ginn.

Wat déi administrativ Oploen ugeet, sot den neie President vun der Handwierkerfederatioun, et misst onbedéngt eng „Bestandsopnam“ vun der simplification administrative gemaach ginn. Mam Transparenzregëster fir d’Deputéiert, dee soll kommen, géinge senger Meenung no och „Dieren zougoen“. Ugeschwat op ëmstridde Frëndschaften tëscht Politiker a Bauhären zum Beispill, oder op d’Wickreng-Léiweng Affär, sot den Ernest Pirsch dat wieren Ausnamen. Lëtzebuerg wier kee Land vu „Korruptioun“ oder „Wallissen“.

Allerdéngs bedauert den Ernest Pirsch, d’Handwierk géing bei der Politik net genuch Gehéier fannen, dat trotz 8.000 Betriber an 100.000 Mataarbechter. „Dacks genuch kréie mer der op de Kapp an et gëtt net op eis gelauschtert“, huet den Invité regrettéiert. Dat géing awer net fir jidderee gëllen: Mam Mëttelstandsminister Lex Delles vun der DP wier een an der Kris a permanentem Kontakt gewiescht. Och mam grénge Mobilitéitsminister François Bausch hätt hien eng gutt Relatioun, huet den Ernest Pirsch zouginn.

Dat wier awer net de Fall mam gréngen Energieminister Claude Turmes, deen Drock an onrealistesch Virgabe géing maachen. Hie wier och fir eng Transitioun an hien hätt näischt géint Elektromobilitéit, sou den Ernest Pirsch. Mä senger Meenung no wier et „net realisabel“ fir bis 2030 de Fuerpark ganz z’elektrifizéieren. Hien huet zouginn, et misst ee probéieren, mä net mam Briecheisen.

Invité vun der Redaktioun: Ernest Pirsch

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.