E Méindeg de Moie war d'Ombudsman eis Invitée vun der Redaktioun.

D'Mediatrice Claudia Monti stellt e Méindeg an der Chamber de Rapport vun 2020 vir. Bei hir kann ee sech jo iwwer staatlech oder kommunal Decisioune beschwéieren. De Méindeg de Moie war si eis Invitée vun der Redaktioun. Do huet si scho verroden, datt et 2020 bal 1.000 Reklamatioune goufen. Ongeféier d'nämmlecht vill ewéi dat Joer virdrun.

D'Liewe vun de Leit a vun den Administratioune wier eigentlech trotz Pandemie normal weidergaangen. Vill Reklamatiounen haten natierlech mat der Coronapandemie ze dinn, zum Beispill mat de Restriktiounen.

Aner Problemer, zum Beispill a Relatioun mam Logement oder der Adem, wieren awer weider e Sujet bliwwen. Och beim Ombudsman huet ee sech wéinst der Pandemie intern missen ëmorganiséieren, fir d'Kontinuitéit vum Service z'assuréieren. Dat hätt zwee bis dräi Méint gedauert, wier awer gelongen.

Op d'Sécherheetsstruktur fir Jugendlecher, d'Unisec zu Dräibuer, ugeschwat, do wëll d'Claudi Monti näischt ausschléissen. Net datt se ausgebaut géif ginn oder vläicht eng aner, zousätzlech Infrastruktur. Fir d'éischt misst awer genee gekuckt ginn, wien déi Jonk sinn a wéi ee se am beschte soll encadréieren.

Invité vun der Redaktioun: Claudia Monti

D'Unisec ass och d'Thema vun enger urgenter parlamentarescher Fro vun der CSV un d'Justizministesch Sam Tanson. D'Deputéiert Mosar a Roth froen, ob et stëmmt, datt op d'mannst ee vun den 2 Jonken, déi an eng déidlech Messerattack zu Bouneweg verwéckelt waren, nees op fräiem Fouss ass. De Jonken, deen no dësem Tëschefall op Dräibuer komm war, ass entretemps groussjäreg.

D'Deputéiert froen, ob d'Justizministesch der Meenung ass, ob Entloossungen no sou uergen Doten dee richtege Message sinn an no wéi enge Krittären de Jugendriichter déi entspriechend Decisiounen hëlt.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.