En Donneschdeg de Moie war d'Co-Fraktiounspresidentin vun der CSV Invitée vun der Redaktioun.

Wéinst der Situatioun an de Spideeler a wann d'Vaccinen hëllefen, da wier den Ament emol jidderee selwer fir seng Gesondheet responsabel. Deemno kéint een net soen, datt d'Corona-Restriktiounen ze séier méi labber gemaach goufen. Dat sot d'CSV-Co-Fraktiounspresidentin Martine Hansen am RTL-Interview. Si war den Donneschdeg de Moien eis Invitée vun der Redaktioun.

Et wier awer wichteg, Analysen ze maachen, ënnert anerem iwwer d'Effikassitéit vun den Impfungen oder d'Clusteren, déi ronderëm Nationalfeierdag entstane sinn. Do misst genee gekuckt ginn, ob et Schwaachstelle beim Covid-Check ginn an da misst ugepasst ginn. Et sollt och e sanitäert Konzept fir Evenementer bis 300 Leit ausgeschafft ginn. De Risiko wier awer ni null. Dowéinst missten d'Leit, a speziell déi Jonk, weider motivéiert ginn, fir sech impfen ze loossen.

Et misst och preventiv geschafft ginn, wann et zu enger weiderer Well géif kommen. D'Spideeler sollte besser preparéiert an eeler a vulnerabel Leit besser protegéiert ginn. Allgemeng wiere méi streng Covid-Mesuren den Ament net néideg, sou d'Martine Hansen vun der CSV, awer Nobesserungen op eenzele Punkte sollt ee maachen.

Invité vun der Redaktioun: Martine Hansen

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.