E Freideg de Moie war d'Gesondheetsministesch eis Invitée vun der Redaktioun.

"Mir wollten de Schnelltest net ofschafen, dofir probéiere mer elo déi Léisung bis 12 Auer". D‘Paulette Lenert war e Freideg de Moien eis Invitée vun der Redaktioun an huet op d‘Kriticke reagéiert, datt an Zukunft en Auto-Schnelltest net méi soll no Hallefnuecht gëllen.

Sou eng nuancéiert Léisung wär sécher méi komplizéiert wéi eng radikal, dat weess d’Gesondheetsministesch. Mä et hätt een d‘Schnelltester net wëlle ganz verbidden, well vill op déi zréckgegraff gëtt. Et wéisst een awer och, datt déi beim CovidCheck dat schwächste Glidd an der Kette sinn. D’Schnelltester bidden eng Flexibilitéit a ginn entretemps och gäre genotzt. Mä no Hallefnuecht gëllen an Zukunft just nach certifiéiert Tester.

Allgemeng géif de CovidCheck gutt funktionéieren. Am Private soll e geschwënn och méiglech sinn. Et setzt een och hei vill op d’Eegeresponsabilitéit. Méi wéi 10 Leit wäerten dann och doheem erlaabt sinn. Et muss een dat awer per Mail bei der Santé umellen.

Dës nei Reegele gëllen awer eréischt nom 15. Juli, also a genee enger Woch, nodeems d’Chamber d’Gesetz gestëmmt huet.

D‘Ministesch huet och preziséiert, datt beim CovidCheck och certifiéiert Schnelltester gëllen ouni QR-Code, déi d‘Schüler zum Beispill an der Schoul kréien. Och déi mussen am Kader vum CovidCheck acceptéiert ginn.

Vun dësem Freideg u si jo och Kräizimpfunge méiglech. Konkreet heescht dat, datt een no enger éischter AstraZeneca-Dosis am Impfzenter däerf decidéieren, ob een als zweet Dosis en mRNA-Vaccin (Biontech oder Moderna) wëll. Etüden hu gewisen, datt de Schutz da méi grouss wär. D‘Gesondheetsministesch weist awer drop hin, datt dat fräiwëlleg ass, an datt net grad all Land eng Kräizimpfung als komplett Vaccinatioun unerkennt, Malta zum Beispill net.

All d‘Kanner a Jugendlech iwwer 12 Joer krute jo och eng Impfinvitatioun heem geschéckt. Wann ee Bedenken huet, soll ee mat sengem Pediater oder Dokter schwätzen, réit d‘Gesondheetsministesch. Vun August u wäert een och d‘Méiglechkeet hunn, säi Kand beim Pediater impfen ze loossen.

Invité vun der Redaktioun: Paulette Lenert

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.