En Donneschdeg de Moie war den Direkter vun der Dikrecher Brauerei eisen Invité vun der Redaktioun.

Et ginn och Jugementer, wou d'Riichter decidéiert hunn, datt Caféen de ganze Loyer musse bezuelen. Dat war déi éischt Reaktioun vum Direkter vun der Dikrecher Brauerei, de Wim Gallet, den Donneschdeg de Moien hei op RTL, op eng Serie Urteeler, déi zeréckbehalen hunn, datt d'Caféen net missten de Loyer integral bezuelen an där Zäit wéi d'Covid-Restriktiounen en place waren. D'Situatioun ass also méi balancéiert, sou de Wim Gallet.

Iwwert déi Urteeler ass den Direkter vun der Dikrecher Brauerei "iwwerrascht". Hien hätt de Prinzip vu Solidaritéit gär a géing verstoen, datt et wéinst dem Covid schwéier Zäite sinn. Par konter misst een dem Wim Gallet no och d'finanziell Hëllef vum Staat och a Betruecht zéien, déi d'Caféen kruten.

D'Dikrecher Brauerei huet nach net decidéiert, ob se e Pourvoi a Cassatioun mécht oder net, sou den Direkter vun der Brauerei weider. Well d'Brauerei Intermediaire ass – selwer vu Proprietäre lount an u Caféë weiderverlount – géing se och probéieren, mat de Proprietären eng Léisung ze fannen. "Wa mir 1.000 Euro Loyer kréien, da bezuele mir och 1.000 Euro Loyer weider", sou de Wim Gallet. Hien huet awer zouginn, datt d'Brauerei an eenzele Fäll méi Loyer vum Café gefrot huet ewéi de Proprietär, mee hien huet verséchert, dat wier elo net méi de Fall.

Den Direkter vun der Dikrecher Brauerei sot, hie géing wierklech hoffen, hie misst net allkéiers viru Geriicht goen, well dat wier fir jiddereen "ermiddend". Während dem Lockdown hunn d'Brauereien an d'Caféë mat de Proprietäre verhandelt, fir Loyeren nogelooss ze kréien. Wéi dacks et gelongen oder net gelongen ass, dat ass net gewosst.

Invité vun der Redaktioun: Wim Gallet

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.