E Freideg de Moie waren den Direkter vum Waasserwirtschaftsamt an de Buergermeeschter vun der Gemeng Rouspert-Mompech eis Invitéeë vun der Redaktioun.

Wéi et am Moment ausgesäit, ass dat Schlëmmst effektiv iwwerstanen. Dat huet e Freideg de Moien de Jean-Paul Lickes, Direkter vum Waasserwirtschaftsamt, am RTL-Interview confirméiert. Et géif ee virsiichtshallwer awer mol nach an der rouder Alerte-Phas bleiwen.

Fir de Summer wier dat do op alle Fall en extrem-aussergewéinleche Phänomeen. Een Ament hat een en Donneschdeg gefaart, dass och nach Donnerwiedere géifen optrieden, wat awer ausblouf.

De Jean-Paul Lickes huet och confirméiert, dass de Pic vum 100-jährejen Héichwaasser op ganzer 9 Plaze simultan am Land iwwerschratt gouf.

Vill gehäit ass ee laanscht d’Ënnersauer virun allem an der Gemeng Rouspert-Mompech, och wann een Héichwaasser géif kennen, dat wat en Donneschdeg geschitt ass, hätt ee bis ewell nach ni erlieft, mat Peegelstänn vun iwwer 9 Meter, sot de concernéierte Buergermeeschter Romain Osweiler als eisen Invité vun der Redaktioun.

D’Waasser wier op Plaze komm, wou et bis ewell nach ni stoung. All Awunner vun der Gemeng, dee wollt, konnt iwwerdeems relogéiert ginn.

E grousse Problem géif de Stroum bleiwen, dee weiderhi fort ass. Dat ze léisen, wier leider net einfach ze geréieren, soulaang wéi d’Waasser weiderhin nach an de Stroossen an an den Haiser steet, sou de Romain Osweiler.

Ze kläre géif iwwerdeems elo bleiwen, ob d’Drénkwaasserversuergung an de schlëmm betraffene Gebidder weiderhi qualitativ geséchert ass.  Dat selwecht gëllt am ëmgedréinte Sënn fir d’Kläranlagen, beispillsweis déi zu Iechternach, déi en Donneschdeg komplett iwwerschwemmt gouf.

Invité Jean-Paul Lickes a Romain Osweiler

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.