En Dënschdeg de Moie war d'Éierepresidentin vum Uno-Kannerrechtscomité eis Invitée vun der Redaktioun.

De Jugendschutz an d'Jugendstrofrecht mussen onbedéngt zwee Gesetzer sinn, déi näischt mateneen ze dinn hunn. Dat sot d'Renate Winter, déi fréier Presidentin vum Uno-Comité fir d'Rechter vum Kand den Dënschdeg de Moien hei op RTL.

Si huet erkläert: Um Enn muss et zwee komplett onofhängeg Texter ginn, déi net anenee fléissen a sech héchstens ergänzen. Fir d'Schutzgesetz dierf kee vum Strofrecht zoustänneg sinn, mee zivil Geriichter an d'Verwaltungen. Strofrecht kéim zur Geltung, wa Mannerjäreger eng Strofdot begaangen hunn. Der Renate Winter no misst een onbedéngt och den Ënnerscheed tëscht de Riichter an dem Parquet général maachen.

Am Strofrecht dierf et och net just drëm goen ze bestrofen, ganz am Géigendeel. D'Renate Winter, déi mat un de Reformen am Jugend- a Kannerrecht bedeelegt ass, sot, en neit Kapitel wier am Strofrecht geplangt an zwar dat vun der "Diversioun". Dat ass, wann de Parquet vun enger Strof vu vir eran ewechgeet. En anert Kapitel géing d'Alternativen zu enger Strof virgesinn.

D'fréier Presidentin vum Uno-Comité fir d'Rechter vum Kand ass den Dënschdeg de Moien och op d'aktuell Diskussiounen iwwer d'Gewalt vu Jugendlechen agaangen. Si sot, et huet iwwerhaapt näischt an der Entwécklung vun de Kanner geännert. "Déi éischte Kéier, wéi ee sech driwwer beklot huet, datt Kanner kriminell wieren oder net géinge schaffen, dat staamt vum Sokrates", sou d'Renate Winter. D'Gewalt kéim net vun de Kanner, mee d'Kanner géinge mat Gewalt op Gewalt reagéieren.

Invité vun der Redaktioun: Renate Winter

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.