E Mëttwoch de Moie war d'DP-Deputéiert a Gemengeconseillère zu Iechternach eis Invitée vun der Redaktioun.

Virun den Iwwerschwemmungen d’lescht Woch goufen et national a lokal Warnungen, mä et misst een awer ganz sécher eng Analys maachen. Dat sot d’DP-Deputéiert an Iechternacher Gemengeréitin Carole Hartmann e Mëttwoch de Moien hei op RTL. Hirer Meenung no misst ee sech a Saache Warnungen nach verbesseren an och d’Leit sensibiliséieren, doriwwer zum Beispill wat et iwwerhaapt bedeit. wann eng „Alerte rouge“ ausgeléist gëtt.

Wat d’lescht Woch geschitt ass wier dramatesch, sou d’Carole Hartmann. D’liberal Politikerin sot et ass an de leschten Deeg immens vill geschafft ginn – mat enger riseger Solidaritéit – mee d’Leed an de Schued wieren trotzdeem grouss. Am Verglach mam noen Ausland koum d’Land awer nach mat engem bloen Aen dovunner, well et keng Blesséierter gouf.

D’Carole Hartmann huet am Zesummenhang mam Waringo Rapport op d’Kritik reagéiert, datt de Rapport säin Zil net erfëllt, nämlech d’Clusteren an den Altersheemer z’erklären. D’DP-Deputéiert huet d’Fro opgeworf, ob et iwwerhaapt méiglech wier, wëssenschaftlech ze klären, vu wou Clusteren hierkommen. D’Heemer ganz zoumaache wier op jidder Fall net déi richteg Reaktioun gewiescht. D’Carole Hartmann sot awer och, et hätt een an dëser Kris net kënnen alles richteg maachen an awer géing een elo och Léieren zéien. Si huet och zouginn, datt awer nach vill Froen opstinn. Si geet dovunner aus, datt d’Diskussiounen och wäerte weidergoen.

Invité vun der Redaktioun: Carole Hartmann

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.