En Donneschdeg de Moie war d'Porte-parole vun der Studentenassociatioun Unel eis Invitée vun der Redaktioun.

Déi Jonk si midd no annerhallwem Joer Pandemie, mä gi mat Hoffnung an dat neit Schouljoer, dat sot den Donneschdeg de Moien d'Porte-parole vun der Unel, der Unioun vun de Lëtzebuerger Studenten a Studentinnen, bei eis um Radio. D'Estelle Née war eis Invitée vun der Redaktioun a fuerdert, et misst e Monitoring gemaach gi vun all deem, wat och net sou gutt geklappt huet, och vun de schoulesche Resultater.

Duerch den Homeschooling u sech hätten déi Jonk elo net automatesch all méi schlecht geléiert, mä sécher anescht.

De positive Fazit vum Educatiounsministère am Mee, datt d'Zuel vun de Schoulofbriecher trotz Pandemie stabel a bei 1.670 bliwwen ass, deelt déi jonk Fra net. Een Decrocheur wier schonn een ze vill an de ganze Rescht vum Schouljoer géif jo och nach feelen.

Donieft fuerdert d'Unel, datt den Impakt vun der Pandemie op déi schoulesch Leeschtungen allgemeng analyséiert gëtt. Déi méi héich Zuel vu Schüler, déi am Ofschlossexamen dëst Joer duerchgefall sinn, wier dat eent, awer nach laang net alles.

D'Pandemie hätt donieft och d'Ongläichheete bei deene Jonke verstäerkt. Ouni Studentenjob hätte verschidde Studenten hire Studium net méi finanzéiert kritt. Fir d'Rentrée wënscht d'Unel sech méi Presenzunterrecht an e besseren Dialog mat de Concernéierten. Et misst een déi negativ Konsequenze sou gutt wéi méiglech offiederen. D'Vakanz hätte sech d'Schüler, Schülerinnen a Studenten op alle Fall méi wéi verdéngt.

Invité vun der Redaktioun: Estelle Née

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.