E Freideg de Moie war de Generalsekretär vum Groupement vun de Lëtzebuerger Bauentreprisen eisen Invité vun der Redaktioun.

"Nodeems mer gemengt haten, mir hätten eis erkrut vun der Pandemie, ass eis dat mat de Matière premièren op de Bockel gefall" - dat sot de Pol Faber e Freideg de Moien hei op der Antenn. De Generalsekretär vum Groupement vun de Bauentreprisë war eisen Invité vun der Redaktioun, dëst um leschte Schaffdag virum Kollektivcongé.

Bei ëffentleche Kontrakter wier dat manner problematesch, mä bei private Marchéë géing d'Entreprise fir d'Käschten opkommen. Am Ausland géing et elo plazeweis Ausname ginn, datt d'Entreprisë bei Retarde keng Penalitéite misste bezuelen. Dat, wa si noweise kéint, datt si näischt dofir kéint, datt d'Material net erbäikoum. Dat misst och zu Lëtzebuerg kommen, esou de Pol Faber.

Am Verglach mat anere Secteuren wier de Bau nach mat engem bloen A dovu komm, ma trotzdeem hätt 2020 7 Woche laang net kënne geschafft ginn. Nom Kollektivcongé den 23. August wäerten op de Chantiere Corona-Schnelltester gemaach ginn, fir fir eng sécher Aarbechtsplaz ze suergen.

Invité vun der Redaktioun: Pol Faber

An der Vergaangenheet wier et eemol eng kleng Diskussioun heiriwwer ginn, mä de fin mot war deen, datt de Kollektiv-Congé eng valabel Léisung wier, sou de Jean-Luc De Matteis vum OGBL.

De Jean-Luc de Matteis

Datt d'Entrepreneure wéilten um congé collectif fréckelen, déi Impressioun hätt hien net, sou de Jean-Luc De Mattteis. Wa Kriticke kéimen, da kéimen se éischter vu baussent dem Secteur.

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.