E Freideg de Moie war de President vum Syvicol eisen Invité vun der Redaktioun.

D'Kommunikatioun am Virfeld vun den Iwwerschwemmunge viru méi wéi 3 Woche war net optimal. Et war een net drop preparéiert, datt et esou schlëmm géif ginn. Dat sot den Emile Eicher, President vum Gemengesyndikat Syvicol, de Freideg de Moien als eisen Invité vun der Redaktioun.

Et konnt ee sech esou uerg Iwwerschwemmungen net virstellen, well et esou eppes nach ni gouf. Kloer wär awer, datt ee misst en effiziente Katastropheschutz opbauen.

D'Solidaritéit tëscht de Gemenge wier awer grouss gewiescht. Iwwer e WhatsApp-Grupp, wou d'Buergermeeschteren dra sinn, ass sech organiséiert ginn. Besonnesch d'Südgemengen hätten direkt mat Material gehollef, sot den Emile Eicher.

Et bräicht ee méi en effikassen Alerte-System, deen ënnert anerem, ouni eppes erofzelueden oder sech unzemellen, iwwert den Handy funktionéiert. Awer mat enger klorer Struktur, wat wéini erausgeschéckt gëtt, fir keng Panik ze provozéieren. Am Taiwan hätt hie selwer eng Äerdbiewe-Warnung materlieft. Jiddereen hätt déi op den Handy mat enger ganz staarker Vibratioun kritt. Déi klassesch Warnungen iwwer d'Medie wären awer och weider wichteg.

En Uspriechpartner am Fall vun Naturkatastrophen an all Gemeng wär och eng Iddi. Dee géif sech och ëm d'Preventioun këmmeren an dat bei all Zorte vun Naturkatastrophen.

Et misst deels och anescht gebaut ginn oder nogerëscht ginn. D'Bassinen de rétention an der Nordstad hätte gutt funktionéiert. Wann ee beim Waasser baut, kéint een net traditionell bauen. An deels ëmdenken, an eisem Altersheem plënnere mer d'Elektresch zum Beispill aus dem Keller ënnert den Daach, sou de Syvicol-President a Buergermeeschter vu Klierf.

All Dag géif zousätzlech versigelt ginn. Mir musse méi renaturiséieren, mussen dem Waasser Raum ginn, wou et kee Schued mécht, gëtt de Syvicol-President Emile Eicher ze bedenken.

Invité vun der Redaktioun: Emile Eicher

Rendez-vous fir den Interview mam Invité vun der Redaktioun all Dag vu méindes bis freides um 10 op 8 op RTL Radio Lëtzebuerg an am Livestream och op RTL.lu an an der App (Audio a Video). Op RTL.lu an op der App ass d'Emissioun dono och am Replay ze fannen.