1970 ass dat Joer an deem mer haut mat der Pop History Statioun maachen. Mëtt Mee vun deem Joer klëmmt en Album an d'Charts, deem bis haut e groussen Afloss op d'Evolutioun vun der Rockmusek nogesot gëtt

15-05-2020 Pop History - Den eischte Black Sabbath Album

Et ass den éischten Album vun der englescher Band Black Sabbath, déi als Pionnéier a Matbegrënner vum Hard Rock gëllen an déi eng vun de gréisste Rockbands vun den 1970er ginn. Ozzy Osbourne, Tony Iommi, Geezer Butler a Bill Ward huelen hiren éischten Album, deen d'selwecht wéi d'Band heescht, an nëmmen 12 Stonnen op a virun allem d'Titellidd gëllt fir vill Kritiker bis haut als éischt Heavy-Metal Lidd iwwerhaapt.
Den Album, mat sengen 8 Lidder drop, packt et esouwuel an England wéi och bei eisen däitschen Nopere bis op d'Plaz 8 an den Albumcharts a ka sech iwwert eng Millioun Mol verkafen. De groussen Duerchbroch geléngt Black Sabbath awer wuel eréischt mat hirem zweete Paranoid, deen nach am selwechte Joer erauskënnt a bis 2013 deen eenzegen Nummer 1 Album vu Black Sabbath an England bleiwe sollt. Och hei ass et d'Titellidd vum Album, wat seng Spueren an der Geschicht vum Rock hannerlooss huet.
De ganzen Album ass däitlech manner vum Blues beaflosst wéi dat den éischten Album vun der Band ronderëm den Ozzy Osbourne nach war a kann, dat behaapten nees eng ganz Rei vu Musekskritiker an Historiker, als definitve Grondstee fir de Genre vum Heavy Metal gëllen.
An de Joeren duerno sinn et virun allem d'Exzesser vum Frontmann Ozzy Osbourne, déi fir Headlines suergen, mat sengem, nenne mer et emol, Erausklammen aus der Band 1979, wéi en mol net méi capabel war den neien Album vu Black Sabbath opzehuelen, geet eng Period lass an där d'Membere vun der Band stänneg wiesselen an de Succès ëmmer méi kleng gëtt. Dee kënnt eréischt 1997 mam Ozzy Osbourne erëm wéi d'Band nees an Originalbesetzung op der Bühn steet.
An Originalbesetzung hu Black Sabbath och 2013 hire bis ewell leschten Album 13 erausbruecht, op deem mat GOD IS DEAD och déi éischte Single vun der Band ze fannen ass, déi et zënter hirem Nummer 1 Hit Paranoid am Joer 1970 nees an déi britesch Charts gepackt huet.