Mat dem Wuert "Burlesque" ass meeschtens en Theaterstéck gemengt, dat op Parodie baséiert.  A wann en Auteur den Numm "Bürlesk" als säin Nom de Plume auswielt, da mécht en dat net ouni Grond. A sénger éischter Buchpublikatioun "The Pleasure of Drowning" parodéiert de Jean Bürlesk bekannte Märercher a geheit domat e ganz neit Liicht op Cinderella, Rabonzel a Co. D'Bea Kneip huet d'Detailer.

18/03/2020 Lecture vun heiheem - Jean Burlesk

Fir säin Erzielband "The Pleasure of Drowning" krut de Jean Beurlet, alias Jean Bürlesk d'lescht Joer de Prix d'encouragement vun der Fondation Servais. Deen 28 Joer jonke Lëtzebuerger, dee mat senge laangen Hoer an dem obligatoreschen Hutt e bëssen un e jonken Nico Helminger erënnert, ass vun de Märercher ëmmer scho faszinéiert gewiescht. Mäerecher, Zitat, si fir hien Geschichten mat deene mir opwuessen, Geschichten déi mir ëmmer mat eis droen. Si gi net just gelies a gelauschtert, si gi gelieft. Interessant dobäi ass dass d'Grondmusteren dacks déi selwëscht bleiwen an eis doduerch eppes vun eiser Essenz, vun eiser Séil verroden, och grad déi méi donkel Säit. Gläichzäiteg ginn déi Geschichten awer och ëmmer rëm adaptéiert, bleiwen also ëmmer „modern“. Et faszinéiert hien ëmmer nees wat dobäi verännert gëtt – a wat net.

Sou sinn och déi Märercher déi hie fir dëse Band op de Leescht geholl huet, direkt erëm z'erkennen, si kréien awer alleguer eng nei Nues. Sou wéi d'Melusina déi vun hirem Pëtz aus bei enger Touristeféierung Maische spillt. Oder d'Béischt an der Geschicht The Beauty of the Beast. An d'Cinderella kann och emol ongedëlleg ginn, wa säi Prënz sech ze vill Zäit léisst. esou ongedëlleg dass op eemol säin anere Schong geflu kënnt...

Duerch d'Harry Potter Bicher huet de Jean Bürlesk säin Häerz un de Fantasy-Genre verluer. Eng Passioun déi duerch dem Neil Gaiman seng Bicher weider gewuess ass. Sécher ass et och deen Afloss deen dozou gefouert huet, dass de Jean Bürlesk seng Bicher op Englesch schreift. Dobäi passt och den typesch briteschen Humor deen hien sech ugeeegent huet, a seng Manéier fir etabléiert Regelen op d'Kopp ze dréinen. Wéi zum Beipill e Virwuert um Enn vum Buch. Wat awer Sënn mécht, well d'Nowuert gläich um Ufank ze fannen ass, direkt hannert der éischter Kuerzgeschicht. Logesch!

D'Texter am Buch goufen tëscht 2014 an 2018 geschriwwen. Dat fäerdegt Manuskript huet hien dann der Fondation Servais zougeschéckt, de Rescht ass Geschicht. E Buch dat Spaass mécht an dat ass an dësen däischteren Zäiten  net vu Mutwëll! 

"The Pleasure of Drowning" vum Jean Bürlesk ass bei "Luna Press Publishing" zu Edinburgh erauskomm, wou een och online bestelle kann. An de Lëtzebuerger Bicherbutteker wäert et ze fanne sinn, soubal wéi do d'Diren nees opginn. 

© Jean Bürlesk