Am Kader vum Programm "Creative Europe" gëtt den europäesche Literaturpräis all Joer un Auteuren aus verschiddenen europäesche Länner verdeelt. Dëst Joer war nieft 12 anere Länner, och Lëtzebuerg un der Rei fir e Laureat ze proposéieren. Gewënner fir 2020 ass de Francis Kirps, dee mat sengem Erzielband "Die Mutationen" iwwregens och op der Shortlist fir de Servais-Präis steet. D'Bea Kneip huet d'Detailer. 

20/05/2020 Lecture vun heiheem: Den EUPL Gewënner Francis Kirps

7 Erzielungen an ee Gedicht, dat ass déi éischter ongewinnte Kombinatioun vun Texter déi am Francis Kirps senge "Mutationen" ze fannen ass. En Titel, deen net zoufälleg gewielt ass, well all déi Texter baséieren op Klassiker aus der europäescher Literatur wéi, zum Beispill dem Kafka seng "Verwandlung" oder "Krambambuli" vun der Marie von Ebner-Eschenbach. Just, dass déi ënnert dem Francis Kirps senger Fieder alleguer liicht mutéiert sinn, souzesoen genetesch verännert. D'original DNA ass zwar duerchaus erëmz'erkennen, si ass eben einfach just evoluéiert fir eppes ganz Neies doraus ze schafen. Kee ganz einfachen Exercice, deen dem Francis Kirps awer duerchaus gelongen ass. Domat konnt en och de Jury ënnert der Présidence vun der Jeanne Glesener iwwerzeegen. 
Jeanne Glesener:Ënnert dem Francis Kirps senger präziser an humorvoller Fieder ginn d'Texter op ganz eegen Aart a Weis revisitéiert. De Jury hu virun allem déi gekonnt intertextuell Verwiewunge mat de Virtexter, d'Transplantatioun vun Handlungen a Protagonisten an onerwaart Kontexter an hir originell Ëmgestaltung beandrockt. D'Kenne vun de Virtexter, och wann et de Pleséier vum Liese verstäerkt, ass awer net noutwendeg fir dem Kiprs seng Erzielungen z'appreciéieren. D'Geschichte stinn nämlech selbstbewosst fir sech, gi gedroen vum Kirps senger kräfteger a ganz eegener literarescher Stëmm a vu senger exceptioneller Imaginatiounskraaft. 

Wien d'Buch gelies huet, kann dat op alle Fall novollzéien. Schonn a séngen 2 éischte Bicher "Planet Luxemburg" an "Die Klasse von 77" huet de Francis Kirps bewisen, dass hien ëm den Eck denke kann, sech kenger Konventioun verbonne fillt. Domat gëtt aus de Mutationen eng grad esou usprochsvoll wéi och amüsant Lecture. Bei aller Liichtegkeet déi säi Wierk ausstraalt, kann ee séier emol vergiessen, dass dohanner e Projet stécht dee mat vill Aarbecht verbonne war, souwuel fir den Auteur wéi och fir den Editeur. 

Francis Kirps: Et ass op jidde Fall flott, dass déi vill Aarbecht déi mir eis fir dat Buch gemaach hunn, dass dat elo e bëssen honoréiert gëtt. An jo, bon, ech fréeë mech, a kucken wat nach alles elo op mech zoukënnt mat dem Präis, Optrëtter an esou weider. A, jo, Merci dem Jury! Ech weess och net wat ech vill méi soll soen, well et ass einfach nach e bëssen nei. Awer ech fréeë mech op jidde Fall fir dat gewonnen ze hunn, a kucke mer emol wat nach kënnt. 

Wat nach kënnt, ass d'Präisiwwerreechung déi fir den 29ste September zu Bréissel geplangt ass. Och wann doriwwer nach datselwecht Fragezeichen steet wéi iwwer alle groussen Evenementer an dësem Joer, dierft de Präis awer fir den Auteur a säi Wierk e Sprongbriet sinn. Deel vum Konzept vum European Prize for Literature ass den Zougang zu Iwwersetzungen vun deem och schonn déi fréier EUPL Gewënner Tullio Forgiarini, Gast Groeber a Jean Back profitéiere konnten.  De Jean Back deen iwwregens och dëst Joer Member vum Jury war, dat nieft dem Literaturvermëttler Jérôme Jaminet, dem Libraire Jean-Claude Henkes, dem Direkter vum CNL Claude D.Conter an natierlech der Präsidentin Jeanne Glesener. E Jury, dem ee fir säi Choix nëmme felicitéiere kann, an e Buch dat een onbedéngt liese sollt. 

  

"Die Mutationen" vum Francis Kirps ass bei Hydre éditions erauskomm.