Déi englesch Sprooch gëtt an der Lëtzebuerger Literatur ëmmer méi wichteg. Dass sech zemol jonk Leit mat Virléift an der Sprooch vum Shakespeare ausdrécken, gesäit een zum Beispill beim Prix Laurence, wou vill Texter op Englesch eragereecht ginn. Och den engleschsproochege Verlag Black Fountain Press riicht sech mat sengem Concours Young Voices u jonk Auteuren tëscht 16 a 26 Joer. Gëschter goufen d'Gewënner vun der Editioun 2020 publik gemaach an et gëtt och e Buch mat de beschten Texter. D'Bea Kneip stellt Iech haut d'Gewënner an der Kategorie 16 bis 19 Joer vir.  

08/07/2020 Lecture vun heieem: Concours a Buch "Young Voices"

2017 hat den engleschsproochege Verlag Black Fountain Press schonn e Schreif- Concours fir Jonker lancéiert, mat groussem Succès! Dozou d'Anne-Marie Reuter vu Black Fountain Press. Anne-Marie Reuter: Mir waren zimlech iwwerwältegt dee Moment vum Succès vun deem Concours. Mir haten immens vill Texter geschéckt kritt déi eng ganz grouss Qualitéit haten an dofir war et fir eis kloer, dass mir dee Concours op alle Fall nach eng Kéier géife maachen. Mir waren immens frou wéi d'Uni op eis zoukomm ass an d'Jeanne Glesener, d'Mylène Branco an d'Anne-Marie Millim eis drop ugeschwat hunn an eis gesot hunn, dass si wéilten eng Kollaboratioun mat eis ënnerhuelen. 

55 Texter am Format Short Fiction goufen agereecht, 22 dovun an der Alterskategorie 20-26 Joer, an 33 vu Jonken tëscht 16 an 19 Joer. D'Meedercher waren dobäi liicht an der Iwwerzuel. En éischten an en zweete Präis gouf et an all Kategorie ze verginn. 

Bei de Lycéesschüler bis 19 Joer war den zweete Präis fir den Noah Gudgeon. Den Noah gouf zu London gebuer a lieft zënter 2007 zesumme mat sénger Famill zu Lëtzebuerg De Schüler aus dem Dikkrecher Lycée interesséiert sech besonnesch fir Konscht a Musek. A sénger Kuerzgeschicht mam Titel "The Pie" geet et ëm den Doft vun engem frëschgebakene Kuch an e Protagonist dee wuertwiertlech der Nues nogeet fir dat lakelescht Gebäck ze fannen.        
Extrait aus "The Pie" vum Noah Gudgeon: Simon was about to cross the road when he detected the aroma of fresh pastry. He tried to ignore it, but failed. The scent was just too strong and inviting. Simon was not a man who was easily tempted, but he had a soft spot for pastry. So, he changed course and followed the smell, since he was sure the source would be nearby anyway. 

"It takes Courage"...et brauch ee Courage fir zu sech selwer ze stoen.Dorëms geet et an der Kuerzgeschicht mat der d'Anouk Schreiner den éischte Präis gewonnen huet. E Psysiksproff deen, wahrscheinlech ouni emol grouss driwwer nozedenken, eng Remarque mécht déi net ok ass...

Anouk Schreiner: Mäin Text schwätzt iwwer d'Alldagshomophobie a wat si mat Betraffene mécht. E baséiert op Situatiounen déi esou oder esou ähnlech an der realitéit passéiert sinn.  

Déi 19 Joer jonk Fra vu Wanseler huet schonn als Kand ugefaange mat schreiwen

Anouk Schreiner: Ech war e gehirlose Bicherwuerm als Kand a Schreiwen a Liesen ass fir mech ëmmer iergendwéi Hand an Hand gaangen. Haut ass et eigentlech meng Manéier fir meng gefiller, wat ech erliewen, ze verschaffen.  

A wat sinn hir literaresch Virbiller?

Anouk Schreiner: Et gëtt ze vill gutt Bicher fir sech op eent festzeléeën, mäi mäi Liiblingsauteur ass de Paul Celan. 

Fir d'Gedicht "Balancierübung" krut d'Anouk Schreiner iwwregens de Coup de Coeur beim Prix Laurence 2019.. 
An der Kategorie 20 bis 26 Joer heeschen d'Gewënner Amela Skenderovic a Maxime Weber. Si kommen natierlech och zu Wuert, dat an eiser nächster Lecture vun heiheem dëse Samschdeg um véierel op 9.  

D'Buch mam Titel "Young Voices" ass och elo bei Black Fountain Press erauskomm.