"I hope the Russians love their children too" - e vill diskutéierte Saz, provokant, deplacéiert, mëssverstanen? D'Geschicht an d'Analys vum Sting sengem weltwäiten Hit vun 1985, deen dëser Deeg leider nees an d'Aktualitéit geréckelt ass.

04/03/2022 Gedanken zu "Russians" (Sting 1985)

Dem Sting, Joergang 1951, seng Biographie ass natierlech och markéiert vum Kale Krich, apaart vun der Kuba-Kris 1962 an deem quasi permanente Konflikt tëscht dem Westen, virop den USA, an dem Ostblock, mat am Zentrum, der deemoleger Sowjetunioun.

No senger Karriär mat «The Police» war de Sting 1983 zu New York fir u sengem éischte Solo-Album «The Dream of the Blue Turtles» ze schaffen.

E gudde Frënd vum him war als Fuerscher un der Columbia Universitéit engagéiert. An deem war et gegléckt, d’Satellitte-Signal vun der russescher Tëlee ze kaperen. Et war spéit am Owend – a Russland Sonndeg Moien - an déi zwee konnten e russesche Kannerprogramm empfänken. De Sting war impressionéiert, wéi vill Méi an Opmierksamkeet an déi Emissioun investéiert gouf.  

Eng vill verbreeten a provokant Meenung am Weste war deemools, datt d’Russe kal, ouni Gefiller an eben net human wieren. En absurde Gedanken, deen de Sting ëmmer nees am Text vu «Russians» als rhetoresch Fro opwerft an déi ëm logescherweis och vill Kritik abruecht huet. Firwat an aller Welt sollte Russen hir Kanner net gär hunn ? De Sting huet uschléissend kloer gestallt, datt e wuel mëssverstane gi war.

«If the Russians …»  an «I hope the Russians love their children too» - de Sting huet seng Formulatioun vun Zweiwel an Hoffnung méi spéit nei reflektéiert a revidéiert. Op Concerten gouf aus « if » d’Wuert « that » - wat eis all rett ass, DATT och d’Russen hir Kanner gär hunn …

Musikalesch baséiert « Russians » iwwregens op enger Kompositioun vum Sergei Prokofiev, dem 2. Saz aus senger 1933 geschriwwener Filmmusek-Suite «Leutnant Kijé». Dat Wierk war sengerzäit dem Prokofiev seng éischt Kontributioun zu där sougenannter sowjetescher Staatsmusek. Allerdéngs war dee Saz awer och a Groussbritannien zimmlech beléift, zemools ëm Chrëschtdag gouf déi Musek dacks a gären op der Tëlee als Ënnermolung vu Wanterlandschaften agesat.

De Sting wollt «Russians», fir e kulturellt Zeechen ze setzen, ursprénglech mam Sinfonieorchester vun an zu Leningrad aspillen. Well d’Visume fir d’Arees fir hien a seng Band awer net mat Zäite prett waren, sollt dorausser näischt ginn.

Knapp 4 Joerzéngte méi spéit kritt dem Sting säi Song vun deemools nees e Sënn, eng nei Bedeitung – oder awer och net ? Well … op déi heite Fro kann et nëmmen 1 Äntwert ginn :

(Zitat Sting)  "Who wants war? Crazy people!"