Den Éisträicher ass e Méindeg am Alter vu 70 Joer gestuerwen.

Den dräimolege Formel-1-Weltmeeschter Niki Lauda ass dout, dat huet säin Dokter Walter Klepetko um fréien Dënschdeg de Mueren der Agence DPA matgedeelt. Hien ass 70 Joer al ginn. E Porte-Parole vun der Fluchgesellschaft Laudamotion, déi och den Numm vum Niki Lauda huet, huet am Optrag vun der Famill Folgendes publizéiert:

"In tiefer Trauer geben wir bekannt, dass unser geliebter Niki am Montag, den 20.05.2019 im Kreise seiner Familie friedlich entschlafen ist. Seine einzigartigen Erfolge als Sportler und Unternehmer sind und bleiben unvergesslich.

Sein unermüdlicher Tatendrang, seine Geradlinigkeit und sein Mut bleiben Vorbild und Maßstab für uns alle. Abseits der Öffentlichkeit war er ein liebevoller und fürsorgender Ehemann, Vater und Großvater. Er wird uns sehr fehlen."

AUDIO: Doud vum Niki Lauda/Reportage Franky Hippert

D'Formel-1-Legend hat am August d'lescht Joer eng nei Long transplantéiert krut a louch bis Oktober am Spidol. Am Januar gouf hien du wéinst enger Gripp hospitaliséiert, wat deemools als Risiko agestuuft gouf.

Seng Longe ware schonn duerch ee schwéiert Accident am Joer 1976 um Nürburgring uerg beschiedegt ginn. Deemools war de Formel-1-Pilot mat sengem Ferrari an en Zonk gerannt, deen doropshin a Brand geroden ass. Den Éisträicher souz deemools bal eng Minutt laang a de Flamen an huet déi gëfteg Gasen ageotemt, éier hie gerett gouf.

Zanter dësem Ongléck, bei deem net nëmmen seng Kapphaut uerg verbrannt gouf, hat den Niki Lauda ëmmer nees mat gesondheetleche Problemer ze kämpfen. Sou krut hien an de Joren 1997 an 2005 schonn zwou Nieren transplantéiert.

Seng rout Kap war dem Niki Lauda säi Markenzeechen. Dräi Mol war hie Formel-1-Weltmeeschter, 1975, 1977 an 1984. Net manner wéi 54 Mol stoung hien um Podium. Am Joer 1985 huet den Niki Lauda seng Carrière opgehalen an huet sech vun do u gréisstendeels op seng Fluchgesellschaft Lauda Air konzentréiert, war der Formel 1 awer bis zum Schluss enk verbonnen. Hie war ënnert anerem Formel-1-Expert fir RTL an Teamchef bei Jaguar. 2012 gouf hie Chef bei Mercedes an huet mat Lewis Hamilton a Nico Rosberg weider Héichpunkten an der Formel1 erlieft. No Niki Air, déi d'Air Berlin 2011 iwwerholl huet, war den Niki Lauda zanter 2016 mat senger Firma Laudamotion am Beräich mat Privatjetten aktiv.

No enger Gripp am Januar, koum hien nees an d'Spidol an huet och hei seng 70 Joer nach konnte feieren.

Säin Doud koum net onerwaart, sot elo säin Dokter. Ugangs Mee war hien nach an eng Spezial-Klinik an der Schwäiz ageliwwert ginn.

Bild vum Formel-1-Weltmeeschter Niki Lauda aus dem Joer 1975 zu Silverstone. / © PRESS ASSOCIATION / AFP

AUDIO: Reportage vum 22. Februar: Den Niki Lauda kritt 70 Joer

Den Niki Lauda gëtt am Stephansdom zu Wien opgeboert

Déi zoue Lued gëtt e Mëttwoch vu moies 8 bis mëttes 12 Auer am Stephansdom opgeboert. Dat huet eng Mataarbechterin vun der Por St. Stephan en Donneschdeg bekannt ginn. De Public kann dem fréiere Formel-1 Pilot dee Moment eng lescht Éier erweisen. Och d'Mass ass ëffentlech. D'Begriefnis dogéint ass am enkste Familljekrees. D'Offer vun der Stad Wien, dem Niki Lauda een Éieregraf um Zentralkierfecht zu Wien zur Verfügung ze stellen, huet d'Famill vum Verstuerwenen net ugeholl.