Am Kader vun der 3. Manche vun der Autocross-Europameeschterschaft waren de Kevin Peters an d'Gebridder Max a Bob Schanen am Asaz.

De Kevin Peters kënnt an der Final vun der Buggy1600-Kategorie um Enn op déi 5. Plaz a bleift domat 2 Plaze virum Max Schanen op Plaz 7.

Kevin Peters

De Max Schanen hat am Fong en immens staarke Weekend. Säin 1. Virlaf konnt hie gewannen an en ass déi séierst Zäit bei de 1600er gefuer. Am 2. Laf ass et net méi sou gutt gelaf, well dat villt Waasser op der Streck ëm net entgéint komm ass... doduerch war d'Siicht immens beanträchtegt. Hei ass Plaz 4 am Virlaf erausgesprongen. An der Halleffinall war de Max Schanen nees immens staark ënnerwee an e gouf den 2ten, wat duergaangen ass fir vu Plaz 4 aus an d'Finall ze goen. An dëser Finall war de Max Richtung Podium ënnerwee... loung op der 3. Plaz, bis en e Lach ze pake krut a sech gedréint huet. E konnt zwar kuerz drop weiderfueren, mä wéi gesot war et um Enn just eng 7. Plaz, woumat e seng Leeschtung vum ganze Weekend net mat dem verdéngte Resultat ofschléisse konnt.

Gewonne gouf déi Kategorie vum Milan Vanek aus Tschechien, virum Markus Wibbeler (D) an dem Mario Hanneken (D).

An der Junior-Buggy-Kategorie kënnt de Lëtzebuerger Bob Schanen mat dem JVDC Suzuki op Plaz 5, nodeems et an de Virleef ang 3. an eng 4. Plaz gouf.

Bob Schanen

Gewonnen gouf dës Kategorie vum Bart an der Putten (NL), virum Jakup Novotny (CZE) an dem Vaclac Kindl (CZE).

Déi nächst Course an der Autocross-EM ass Enn Juni an Däitschland, méi genee an der Matschenberg Offroad Arena zu Cunewalde.