Nieft dem Bottas sollt säi Mercedes-Kontrahent Lewis Hamilton un den Depart goen. Hie gouf awer strofversat a muss 3 Plazen no hannen.

No enger Zwangspaus vu ronn 4 Méint stoung um Samschdeg mam Qualifying vum Grousse Präis vun Éisträich den Optakt vun der neier Saison an der Formel 1 um Programm. D'Saison 2020 ass duerch de Coronavirus eng ganz besonnesch, dëst well bis elo provisoresch nëmmen 8 Coursë festgesat sinn.

Als Favorit goungen déi zwee Mercedes-Pilote Lewis Hamilton a Vallteri Bottas un den Depart, déi d'fräi Trainingen am Virfeld vum Qualifying ewell dominéiere konnten. Als Protest géint de Rassismus sinn déi zwee Mercedes Autoen och net, wéi üblech, sëlwereg, mee schwaarz.

Schonn am 3. fräien Training koum et zu engem Schockmoment. Hei war et de 25. Joer jonke Kanadier Nicholas Latifi, deen a sengem Williams bei sengem éischte Renn-Weekend an der Formel 1 eng Kollisioun hat, hie konnt awer um Qualifying deelhuelen. Um Enn koum hien hei allerdéngs op déi leschte Plaz.

No senger 5. Plaz an der leschter Saison sollt et fir de Sebastian Vettel och 2020 enttäuschend weidergoen. Hie gouf um Samschdeg just den 11. an hat soumat den 3. Qualifying verpasst.

Un der Spëtzt waren et wéi erwaart d'Mercedes-Piloten, déi sech déi éischte Plazen um Depart séchere konnten. D'Pole zu Spielberg war um Enn fir de Vallteri Bottas, dee sech virum Hamilton behaapte konnt. Den Hamilton muss awer 3 Plazen no hannen, well hien wärend enger Giel-Phas net vum Gas gaange war. An enger éischter Decisioun war hien nach fräigesprach ginn... ma Red Bull huet neit Videomaterial virgewisen, wouropshin d'Stewards hir Decisioun geännert hunn. Den Hamilton muss also elo 3 Plazen no hanne réckelen a start also vu Plaz 5. Zweeten ass domat den Hollänner Max Verstappen, virum 20 Joer jonke Lando Norris op McLaren.

De Start vun der Course ass de Sonndeg um 15:10 Auer.