Verschidde Medien haten et um Dënschdeg ewell gemellt, e Mëttwoch gouf et dunn offiziell annoncéiert.

Alonso nees an der F1 bei Renault / Franky Hippert

Am internationalen Automobilsport gëtt et als Sensatioun betitelt. E Mëttwoch koum d'Confirmatioun: de Fernando Alonso kënnt rëm an d'Formel 1 zeréck. Den 38 Joer ale Spuenier kritt d'nächst Saison nees e Cockpit bei Renault.

De Fernando Alonso war schonn 2005 an 2006 mat der franséischer Ecurie Weltmeeschter ginn. En éischte Statement huet de Spuenier e Mëttwoch de Mëtteg op der Facebook-Säit vum Renault F1 Team ginn:

"Bonjour, super Dag haut, dir wësst d'Lienen tëscht mir an der Ecurie si ganz staark an emotionell, mir hunn net fir näischt 2 Weltmeeschtertitel gewonnen. Awer keng Suergen, ech kucken no vir, net an de Réckspigel. Ech hunn d'Decisioun ganz entspaant geholl an ech sinn iwwerzeegt, datt mer mat der Ecurie nees op de Podium kënnen kommen, an ech och."

Den Australier Daniel Ricciardo verléisst d'Ecurie um Enn vum Joer an Direktioun McLaren. D'Léift tëscht dem Australier a Renault huet sech jo och a Grenze gehalen. 17 Joer, vun 2001 bis 2018, war den Alonso an der Kinneksklass vum Automobilsport. Ënnert anerem ass hien dunn och fir Ferrari a McLaren gefuer.

Seng lescht Formel-1-Course war de Fernando Alonso, deen e Kontrakt fir déi nächst Saisone krut, wéi et offiziell heescht, 2018 gefuer. Bei sengem Comeback wäert d'Formel 1 am Generelle ganz anescht ausgesinn. D'nächst Saison ginn et nämlech verschidden Ännerungen:

"Déi nei Reglementer wäerten et erlaben, nees de Pilot méi an de Mëttelpunkt vun der Performance ze stellen a fir méi Gerechtegkeet suergen."

An de leschte 19 Méint ass de Fernando Alonso virun allem bei Indy-Car-Courssen an Amerika, der Rallye Dakar oder och nach de Laangstrecke-Courssen wéi Le Mans, bei där hien och Weltmeeschter gouf, un den Depart gaangen. Eisen Informatiounen no soll de Spuenier eng Zort Léiermeeschter fir den Estaban Ocon ginn. Dat 23 Joer jonkt franséischt Talent setzt jo an deem anere Cockpit bei Renault. Nieft dem Alonso, waren och nach den Däitschen Nico Hülkenberg, deen och scho bei Renault war, an esouguer och de Finn Valtteri Bottas, deen e Sonndeg mat Mercedes nach den 1. Grand Prix vun der Saison an Éisträich gewonnen huet, bei der Ecurie mat der Raut am Gespréich.

Den nächste Rendez-vous dës Saison ass de Weekend nees zu Spielberg an der Alperepublik.