Direkt zweemol misst d'Course ënnerbrach ginn, dat well et zäitweis zu enger Massekarambolage komm ass.

E perfekte Start gouf et fir de Valtteri Bottas, deen de Lewis Hamilton direkt um Depart vum Grousse Präis vun der Toskana konnt iwwerhuelen. Hannendrun hat de Max Verstappen Problemer, richteg fortzekommen, an ass ëmmer méi lues ginn. Kuerz dorops ass et direkt zu e puer Accidenter komm. De Carlos Sainz huet sech gedréint, de Vettel huet säi Frontfliggel beschiedegt, an de Verstappen koum mam Grosejan a Beréierung, deen dem Red-Bull-Pilot hannen an den Auto gefuer ass. D'Course war domat fir de Red-Bull-Pilot eriwwer.

Nom Safety Car ass et dunn erëm direkt op der Start/Zillinn zur enger Massekarambolage komm, wouropshin d'Course ënnerbrach ginn ass. Nom Restart huet de Valtteri Bottas net beschleunegt a sou ass et hannendrun zu enger Aart Zéiharmonika-Effekt komm, an eng rëtsch Pilote sinn aneneegerannt. Blesséiert huet sech awer keen.

Nom Restart war et de Lewis Hamilton dee säin Team-Kolleeg Valtteri Bottas direkt konnt iwwerhuelen. An der 43. Ronn ass et awer dunn alt erëm hektesch ginn, dat well de Lance Stroll no engem Platten nawell ferm an d'Mauer geknuppt ass. D'Course misst op en Neits ënnerbrach ginn.

Um Enn ka sech trotz dem ganze Chaos alt nees de Brit Lewis Hamilton virum Valtteri Bottas duerchsetzen. Op déi 3. Plaz fiert den Alexander Albon op Red Bull.