Déi legendär 24-Stonne-Course um Nürburgring huet och dëst Joer nees fir immens vill Spannung gesuergt, dat bei immens schwierege Wiederkonditiounen.

De Start vun de 97 Autoe war e Samschdeg um 15h30 an eigentlech sollt d'Course 24 Stonnen daueren... ma et ass awer net 24 Stonne laang gefuer ginn. Um Samschdeg den Owend géint 22h30 Auer gouf d'Course mam roude Fändel ofgebrach, well d'Wiederkonditiounen einfach ze schwiereg waren. Et huet enorm vill gereent an d'Waasser ass einfach net méi vun der Streck ofgelaf. Aus Sécherheetsgrënn gouf  d'Course bis e Sonndeg de Moien 8 Auer ënnerbrach.

Dunn ass et bei typeschen Eifel-Wieder weidergaangen... e bëssen Niwwel, plazeweis dréchen, plazeweis fiicht, deels huet et gereent.

Déi ganz Course iwwer goufen et e sëllegen Ännerungen un der Spëtzt. Vill Favoritte sinn nieft der Streck gelant, haten Accidenter oder soss technesch Problemer, wouduerch ee bis zum Schluss ni wësse konnt, wien um Enn gewënnt. Dat virun allem, well och d'Streckekonditioune stänneg gewiesselt hunn, an een eigentlech ni de wierklech richtege Pneu opleien hat.

Gewonnen huet um Enn den Auto mat der Nummer #99 de BMW M6 GT3 vu Rowe Racing. Op deem Auto gefuer sinn den Nicky Catsburg, den Alexanders Sims, den Nick Yelloly an de Philipp Eng. 10 Joer huet BMW mussen op eng weider Gesamtvictoire bei dëser 24h-Course waarden. Dëst Joer war et dann esou wäit, an et war déi 20. Kéier, dass BMW hei ganz uewen um Podium stoung.

© Romain Scheffen

Op Plaz 2 kënnt den Audi R8 LMS GT3 mat der Startnummer #3 vum Audi Sport Team mam Christopher Haase, Mirko Bortolotti a Markus Winkelhock. De 4. Pilot Robin Frijns huet krankheetsbedéngt musse Forfait erklären.

© Romain Scheffen

Déi 3. Plaz um Podium ass da fir e weidere BMW M6 GT3 #42, déi Kéier vum BMW Team Schnitzer mat dem Augusto Farfus, dem Jens Klingmann, dem Martin Tomczyk an dem Sheldon Van der Linde.

© Romain Scheffen

Platzéierunge vu Pilote mat Lëtzebuerger Lizenz

6 Autoe waren um Depart mat Piloten, déi eng Lëtzebuerger Lizenz hunn.

Am beschten aus der Affär gezunn huet sech de Carlos Rivas um Porsche 911 GT3 Cup MR #35. Hie kënnt mat sengen Teamkolleegen als 22ten iwwert d'Arrivée a gewënnt d'Klass SP-Pro, an där hiren Auto als eenzege gemellt war.

© Romain Scheffen

Op Plaz 39 gesi mer dann den Daniel Bohr um Porsche Cayman 718 GT4 CS #301. An der Klass CUP 3 ass dat Plaz 4.

© Dirk Reiter / JACOBY Pressebüro

Op Plaz 45 da kënnt de Charles Kauffman um Porsche 911 GT3 Cup 2 (#320), deen hie sech ënnert anerem mat dem "Smudo" gedeelt huet. Si sinn an der Klass mat dem alternative Sprit gefuer, a kommen hei op déi 1. Plaz.

© Romain Scheffen

Um Porsche Cayman 718 GTS mat der Startnummer #86 sinn direkt 2 Lëtzebuerger gefuer, dëst mam Yann Munhowen a mam Alain Pier. Si kommen no 24 Stonnen op déi 53. Plaz a gewannen hir Klass SP 4T.

© Romain Scheffen

Net an der Wäertung

De Bob Wilwert a seng Equipiere sinn um Porsche 991 Cup mat der Startnummer #63 ugetrueden. Si stinn am End-Resultat als DNC, also did not classify, obwuel se nom Live-Timing eigentlech op Plaz 38 misste leien. D'Erklärung heivir ass, dass ee vun de 4 Piloten um Auto net de Minimum vu 15 Ronne gefuer ass, déi all Pilot muss gefuer sinn. Beim Team war een dovun ausgaangen, dass dee Minimum reduzéiert gi wier, well jo net déi komplett 24 Stonnen duerchgefuer gouf. Ma deem war net esou. Domat kënnt de Bob Wilwert trotz gudder Leeschtung net an d'Endwäertung. Den Team-Chef huet sech bei de Pilote fir dee Mëssel entschëlleg an de Bob Wilwert huet och schonn ugekënnegt, d'nächst Joer nees bei de 24-Stonnen um Ring um Depart ze sinn.

© Romain Scheffen

De Sébastien Carcone steet am Schlussklassement mam Porsche Cayman 981 GT4 CS #302 als DNF, also did not finish. Dem Live-Timing no wiere se als 59. iwwert d'Arrivée gefuer, ma den Heinz Dolfen, deen op der leschter Ronn am Auto souz, ass net iwwert den Zilstréch gefuer, ma huet decidéiert duerch d'Boxegaass ze fueren. Domat komme si net an d'Wäertung vum Generalklassement. De Sébastien Carcone war immens enttäuscht no der Arrivée an hat an enger éischter Reaktioun keng Erklärung fir dat, wat do an der leschter Ronn geschitt ass. Den Heinz Dolfen huet duerno erkläert, hie wier der Meenung gewiescht, en hätt nach emol mussen e Boxestopp maachen. En huet probéiert via Funk mam Team ze schwätzen, krut awer ze spéit eng Äntwert an ass an d'Box gefuer, wat awer net néideg gewiescht wier. Wier en nach 300 Meter iwwert d'Ligne d'arrivée gefuer, wiere se an d'Wäertung komm. Als Entschëllegung soll d'Team dann elo nach bei der NLS8 un den Depart goen, op Invitatioun vum Heinz Dolfen.

© Romain Scheffen

Fotogalerien