E Sonndeg huet d'Formel 1 no 14 Joer Abstinenz säi Retour op den Autodrome Enzo an Dino Ferrari gefeiert.

De Grand Prix Emilia Romagna war déi 13. Course vun der Saison 2020 an um Enn war et en historeschen Dag fir Mercedes. Der Däitscher Ecurie hunn nëmmen 11 Punkte gefeelt, fir scho 4 Coursse viru Schluss de Konstrukteurstitel fir déi 7. Kéier hannerteneen ze gewannen. E Rekord an der Geschicht vun der Formel 1. De Valtteri Bottas ass vun der Pole an de Lewis Hamilton vu Positioun 2 fortgefuer. Den 35 Joer ale Britt ass awer vum Max Verstappen iwwerholl ginn. Den Trio un der Spëtzt war vum Speed hier de Rescht vum Feld iwwerleeën an ass direkt eng grouss Avance erausgefuer. Fir d'Konkurrenz war et zu dem Zäitpunkt just e Kampf ëm déi 4.Plaz, an déi konnt de Pierre Gasly nom Qualifying net verdeedegen. De Fransous huet säin Alpha Tauri schonn no 8 Ronne missen ofstellen.

Et gouf nëmme wéineg Iwwerhuelmanöver an de Lewis Hamilton huet sech seng éischte Plaz dann och no enger besserer Boxestrategie an no enger fir hie perfekter getimeder Safety-Car-Phas erausgefuer. Hannendrun hu Bottas a Verstappen ëm déi zweete Plaz gekämpft. Mam besseren Enn fir de Finn. Well de Verstappen huet de Bottas an der 43. Ronn wuel iwwerholl, mä dem Pilot vu Red Bull ass 8 Ronne méi spéit de lenken hënneschte Pneu geplatzt.

Domadder ass den Daniel Ricciardo op déi 3. Plaz no vir komm. Et ass den zweete Podium fir Renault dës Saison, mä och den Australier konnt näischt un der Iwwerleeënheet vu Mercedes änneren. De Lewis Hamilton gewënnt kloer virum Valtteri Bottas. Et war den 58. duebele Succès an der Geschicht vu der Ecurie vum Teamchef Toto Wolff. Donieft huet den Hamilton mat senger 93. Victoire säi Rekord weider ausgebaut. De Britt huet elo 85 Punkte Virsprong, bei nach 4 Courssen, déi ze fuere bleiwen. De 7. Weltmeeschtertitel schéngt dem Lewis Hamilton net méi ze huelen ze sinn.
Mat dem 11 Succès an der 13. Course dës Saison huet Mercedes de Konstrukteurstitel awer schonn e Sonndeg gewonnen. An dat fir 7. Kéier hannerteneen.

Lewis Hamilton, Mercedes-AMG Petronas F1-Team: "D'Leit menge villäicht, mir wieren dat gewinnt, mä et ass ëmmer erëm wei déi éischte Kéier mat dëser Ekipp. Ech sinn esou dankbar, en Deel dovunner ze sinn. Esou e Rekord ze briechen, dat huet nach keng Ecurie gepackt. Mir hunn e richteg gudden Teamchef an ech soen och Mercedes, Petronas an all eise Sponsore Merci, déi dat alles méiglech gemaach hunn."

Déiéeischt 5 e Sonndeg heeschen Hamilton, Bottas, Ricciardo, Kvyat a Leclerc. Den nächste GP ass den 15. November zu Istanbul. An och an der Tierkei ass Mercedes de grousse Favorit op eng weider Victoire.