No engem Feeler huet den Dylan Pereiera de Larry ten Voorde misste laanscht loossen an zitt am General domat de Kierzeren.

Mat grousser Spannung gouf op déi leschte Course am Porsche Carrera Cup Däitschland gekuckt. Den éischten am General Larry ten Voorde louch mat nëmme 4 Punkte Virsprong virum Dylan Pereira. Domat hat de Lëtzebuerger op Förch Racing nach all Chancen, d'Schlussklassement fir sech ze entscheeden.

Batter Néierlag fir den Dylan Pereira
No engem Feeler vum Dylan Pereira huet de Lëtzebuerger de Larry ten Voorde misste laanscht zéie loossen an zitt am General domat de Kierzeren.

Den 23 Joer ale Pereira ass vun der Pole aus an d'Course gaangen. De Start ass dem Lëtzebuerger och gutt gelongen an hien huet direkt eng éischt Attack vum ten Voorde op Nebulus Racing by Huber ofgewiert. Kuerz drop huet den Dylan Pereira no enger Rietskéier sech verbremst, ass ze weit vun der Streck ofkomm, huet dem Hollänner Plaz misse maachen an esou huet den Dylan Pereira seng 1. Plaz verluer. Zu dësem Zäitpunkt hat de Lëtzebuerger erëm 9 Punkte Réckstand am General.

De Pereira huet dono alles probéiert a versicht Drock opzebauen op den Éischten am General. No ronn 15 Minutten ass et zu engem Accident vum Felix Neuhofer komm an de Safety-Car huet missen op d'Streck kommen. Wärend dem Safety-Car huet den ten Voorde den Tempo gedrosselt, ass am Zickzack gefuer an et ass zu enger liichter Beréierung tëscht dem Pereira an dem ten Voorde komm. Nom Restart hu sech béid Pilote weiderhin näischt geschenkt an hunn e ganz staarke Racing gewisen.

Fir den Dylan Pereiera sollt et awer net méi duergoen, fir de Larry ten Voorde ze iwwerhuelen. Domat gewënnt den Hollänner net nëmmen déi leschte Course zu Oschersleben, mee och d'Schlussklassement mat 9 Punkte Virsprong op de Lëtzebuerger.

Deen zweete Lëtzebuerger um Depart, de Carlos Rivas, ass vun der 12. Plaz an d'Course gaangen. Hien huet Plaz fir Plaz gutt gemaach a kënnt um Enn op eng gutt 9. Plaz. De Carlos Rivas hat jo schonn de leschte Sonndeg d'ProAM-Wäertung 2020 fir sech entscheet.

Hei kënnt dir d'Course nach emol am Replay kucken.