Et gouf scho méi laang driwwer geschwat - elo ass et kloer: Den Optakt vun der neier Saison an der Formel 1 an Australien fält aus.

De Grousse Präis vu Melbourne an Australien sollt den 21. Mäerz gefuer ginn. Wéinst der Corona-Pandemie wäert d'Course, genee wéi den drëtte Grand-Prix vun der Saison den 11. Abrëll a China, an d'Waasser falen. Dat hat déi franséisch Noriichtenagence AFP gemellt a gouf elo offiziell confirméiert. Béid Coursse sollen an der zweeter Hallschent vum Joer nogeholl ginn.

Hei den offiziellen Update vum Formel 1-Kalenner!

Donieft wäert Imola, dat schonn déi lescht Saison wéinst de Corona-Turbulenzen agespronge war, nees eng Course organiséieren an dozou de Rendez-vous vu Shanghai iwwerhuelen. Dat zweet Lach kéint den 2. Mee Portimao/Portugal fëllen.

Den Optakt vun der Saison, ass also elo dann den 28. Mäerz am Bahrain.