E Sonndeg gouf am Porsche Carrera Cup Däitschland um Nürburgring déi zweet Course vum Weekend gefuer.

An der 10. Course vun der Saison gouf et um Nürburgring an Däitschland déi zweet Victoire vun der Saison fir den Dylan Pereira. De Lëtzebuerger huet déi éischt Plaz wärend der Course net hierginn a sech um Enn virum Laurin Heinrich an dem Loek Hartog behaapt.

E Samschdeg konnt sech den Dylan Pereira schonn als Drëtten eng Plaz um Podium sécheren.

Wéi och an der éischter Course vum Weekend ass den Dylan Pereira vun der Pole Position an d'Course gestart. Nodeems hien den Dag virdrun e schlechten Depart erwëscht hat, konnt hien e Sonndeg nom Start seng Plaz un der Spëtzt vum Feld halen a sech ofsetzen. Méi spannend war et am Réckspigel vum Lëtzebuerger, wou sech ëm déi zweet Plaz gestridde gouf. Um Enn hat do den Däitsche Laurin Heinrich d'Nues vir, dee säi Virsprong als Leader vum Generalklassement domat liicht ausbaue kann. De Loek Hartog huet de Podium mat der drëtter Plaz komplettéiert.

Och fir de Carlos Rivas ass et um Sonndeg super gelaf. Hie gewënnt d'ProAM-Wäertung mat groussem Virsprong a gëtt den exzellenten 15ten am Generalklassement. Hien hat um Enn 17 Sekonnen Avance op den Donchev an 20 Sekonnen op den Alshehab.

Am Generalklassement ass de Laurin Heinrich un der Spëtzt mat 195 Punkten, virum Larry ten Voorde (172) an dem Bastian Buus (149 Punkten). Den Dylan Pereira huet 140 Punken.