An der FIM Endurance World Championship ass de Weekend zu Le Castellet a Frankräich de Bol d'Or gefuer ginn.

Chris Leesch wënnt Bol d'Or

De Weekend ass zu Le Castellet déi lescht 24- Stonne-Course an der FIM Endurance World Championship fir dës Saison gefuer ginn.

E Lëtzebuerger konnt no de 24 Stonne feieren. De Chris Leesch huet mat sengem Honda-Team Rac41-Chromeburner (Leesch, Hardt, Tessels) an der Kategorie Superstock gewonnen. Dat mat engem Virsprong vun 2 Ronnen op d'Team BMRT 3D Maxxes Nevers (Kawasaki) a 6 Ronnen op d'Team Pitlane Endurance #86 (Yamaha).

RTL

© Florian Meuret

De Superstock-Cup gewonnen huet d'Team 18 Sapeurs Pompiers (Yamaha) mam Hugo Clere, Baptiste Guittet an dem Philipp Steinmayr.

D'Decisioun ëm d'Schlussvictoire beim Bol d'Or ass eréischt an der Schlussphas gefall. Um Enn konnt sech d'Team #333 Viltais Racing Igol (Odendaal, Alt an Nigon) fir Yamaha virum Wojcik-Team (Gines, Morais, Linfoot) an SRC Kawasaki (De Puniet, Masson, Marino) duerchsetzen. D'Team F.C.C. TSR Honda (Hook, Techer, Di Meglio) gewënnt den EWC-Titel 2022.

80 Minutte virum Enn vun der Course zu Le Castellet gouf et een Drama fir d'ERC Endurance-Team (Davies, Fores, Checa). D'Ducati ass 22 Stonne bal ouni Problemer gelaf, ma dunn ass ee Problem mat der Kupplung opgetrueden. Déi 2 Ronnen Avance un der Spëtzt waren domadder dohinner an eréischt no 30 Minutte konnt ee weider fueren. Um Enn ass ee just Fënnefte ginn.

Wéi d'Ducati an der Box war, huet d'Startnummer 77 Wójcik Racing Team d'Féierung iwwerholl. Ma 70 Minutte viru Schluss ass d'Kette vun der Yamaha gerass. No 5 Minutten Openthalt an der Box ass et nees weidergaangen, ma d'Féierung war fort.

D'Yamaha-Team Viltais huet d'Chance genotzt, d'Féierung iwwerholl a sech um Enn och d'Victoire beim 100. Bol d'Or geséchert.

Am Motorsport sinn d'Courssen iwwert déi kuerz Distanze schonn ëmmer extrem ustrengend. Wann et iwwer 24 Stonne geet, dann ass een nach eng Kéier an enger ganz anerer Dimensioun, esou de Chris Leesch:

"Et kënnt een iergendwann op de Punkt wou ee mengt, datt een einfach net méi kann, oder datt een de Rhythmus net méi kann halen. Gott sei dank sinn dann d'Kinéen do an d'Equipe fir engem eng Kéier e bëssen eng Paus ze ginn. Déi heite Course war elo nach eng spezifesch nach méi ustrengend, well mer déi ganzen Zäit ënner Drock waren. Mir hunn eis Avance ni konnte wäit genuch ausbaue fir datt mer eis hätte kënnen e bëssen ausrouen oder e bëssi eng Marche gehat hätten am Fall vun engem technesche Feeler."

Zejoert war de 25 Joer ale Lëtzebuerger mat senger Equipe RAC41 Chromeburner an hirer Kategorie op der zweeter Plaz. Elo ass et also déi grouss Premiere op der ieweschter Träppchen:

"Dat ass natierlech en emotionale Moment, d'Equipe schafft scho laang dorop hin, ech natierlech och, dat deet einfach gutt, mä d'Saison war awer komplizéiert, mir hunn souwuel Le Mans wéi Spa 24 Stonne verluer op technesche Problemer, jo an et ass einfach e grandioost Gefill et endlech gepackt ze hunn."

Beim Bol d'Or, enger vun de wichtegste Courssen am Motorradssport, ganz uewen um Podium ze stoen, mécht sécherlech fir d'Zukunft Dieren op, däers ass sech de Chris Leesch, deen elo zanter ronn 6 Joer op professionellen Niveau ënnerwee ass, och bewosst:

"Esou eng Victoire kann natierlech e Sprangbriet si lo fir déi nächst Jore souwuel fir mech wéi och fir d'Equipe.Dat huet sech awer iwwert déi lescht Jore schonn ugedeit, datt mer um richtege Wee sinn. Mir hunn gëschter op jiddwerfalls vill Felicitatioune krut vun Honda Frankräich, vun Honda Europa an esouguer aus Japan. Dat ass schonn impressionnant wann een op eemol mat all deene Leit op eemol ze dinn huet."

U sech ass dem Chris Leesch seng Saison elo eriwwer. Et kéint just nach eventuell eng Preparatiounscourse fir d'nächst Saison a Spuenien gefuer ginn. Besser hätt dës Saison awer op jiddwerfalls net kënnen op en Enn goen.