E Sonndeg den Owend goufen op enger offizieller Presentatioun Detailer iwwert d'Etappe vun der 108. Editioun vum Tour de France matgedeelt.

De Groussen Depart vun der "Grand Boucle" ass de 26. Juni zu Brest. Duerno si weider 3 Etappen an der Bretagne virgesinn. E groussen Highlight wäert mat Sécherheet déi 11. Etapp sinn. Do kënnt et nämlech zu enger Première am Tour de France: D'Coureure mussen den 1.910 Meter héije Mont Ventoux direkt 2 Mol eropfueren am Laf vun enger eenzeger Etapp. Eng éischte Kéier vum "Plateau de Sault" (5%), eng zweete Kéier vum südlechen Hang vu Bédoin (8%) aus.

Donieft ass 2 Mol e Contre-la-Montre virgesinn. En éischten um 5. Dag, den zweeten op der virleschter Etapp an de Wäibierger tëscht Libourne a Saint-Emilion.

Fir spannend Momenter dierften och d'Deeg duerch d'Pyrenäen (5 Deeg) an Alpen (2 Deeg) suergen.

No 3.383 Kilometer soll den Tour de France den 18. Juli 2021 traditionell zu Paräis op de Champs-Elysées op en Enn goen. Ugangs sollten déi éischt 3 Etappen an Dänemark gefuer ginn. Well d'Futtball-Weltmeeschterschaft an d'Olympesch Spiller awer hu missen op nächst Joer verluecht ginn, huet sech Kopenhagen als Standuert fir den Optakt vum Tour de France zeréckgezunn.

RTL iwwerdréit och 2021 d’Grande Boucle an dat all Dag op der Tëlee, um Radio an op RTL.lu. Dat selwecht gëllt fir la Course, déi de 27. Juni op der Mûr-de-Bretagne ukënnt.

De Bob Jungels iwwert d'Streck

De Bob Jungels iwwert den TDF 2021 / Reportage Rich Simon

De Grand Depart vum Tour de France ass dat nächste Joer an der Bretagne a mam Bob Jungels dierft op d'mannst nees 1 Lëtzebuerger um Depart sinn. An deen huet sech natierlech d´Streck schonns am Detail ugekuckt. Déi éischten Deeg an der Bretagne kéinte schonns ganz interessant ginn.

"Wat ëmmer bësse komplizéiert ass, mat Mûr-de-Bretagne, wat keng einfach Arrivée ass, do wäerte schonns bëssen Ecarten entstoen. Dann een éischt Zäitfueren, wat am Klassement schonns eng Roll wäert spillen."

D'Alpe stinn dat nächste Joer virun de Pyrenäen um Programm. Dat sinn Etappen, déi de Bob Jungels relativ gutt kennt.

"Grand Bornand, wou 'Arrivée ass. Tignes, déi Arrivée kenne mir och aus de leschte Joren. Duerno geet et da weider mat Etappen, wou mir 2 Mol de Mont Ventoux fueren. Dat gëtt fir Zuschauer spektakulär."

De Bob Jungels geet dovunner aus, dass Decisioun ëm d'Victoire réischt an der leschter Woch wäert falen.

"Do kommen déi schwéier Biergetappen an och ee lescht Zäitfueren. Do ass natierlech fir Spannung gesuergt bis ganz zum Schluss. Mir hunn dëst Joer gesinn, dass dat ee gutt Rezept ass fir d'Spannung ze halen. Ech denken awer och, dass d'Sprinter net ze kuerz kommen. A mengen Aen gëtt et eng ganz flott Editioun."