De Jempy Drucker ass am Wanter fir d'véierte Kéier a senger professioneller Karriär bei eng aner Ekipp gewiesselt.

Vun dëser Saison u fiert de 34 Joer ale Lëtzebuerger fir Cofidis. Déi franséisch Formatioun ass wuel eng vun deene méi klengen Ekippen um World-Tour-Niveau, mee hofft mam Jempy Drucker e weidere Schrëtt no vir ze maachen.
Cofidis 2020 - Eng Ekipp, déi eppes guttzemaachen huet. Aus den zwou Victoiren 2020 sollen der dës Saison 20 ginn a fir déi sollen 29 Coureuren aus 11 Länner suergen.

Dorënner och de Jempy Drucker, deen no 4 Joer BMC an 2 Joer Bora-hansgrohe dës Saison eng nei Erausfuerderung ugeholl huet.

Mat 34 Joer gehéiert de Jempy Drucker zu de routinéiertste Coureure vun der Ekipp. De Lëtzebuerger soll net nëmme seng Stäerkten an de Pawee-Klassiker ausspillen, mee virun allem dem Sprintstar Elia Viviani hëllefen, no engem Joer endlech erëm ze gewannen. Och wa Cofidis net eng vun de ganz groussen Ekippen am Peloton ass, d'Motivatioun beim Jempy Drucker déi ass do.

Ob ech elo fir eng grouss oder kleng Ekipp gefuer sinn. Ech wëll ëmmer dat Bescht vu mir ginn. Och wann ech elo bësse méi al sinn, huet dat sech net geännert. Ech ginn nach ëmmer gären trainéieren, ob gutt oder schlecht Wieder. Ech kann et och kaum erwaarden, fir endlech nees Course ze fueren. U Motivatioun feelt et net.

Aacht nei Coureuren huet Cofidis fir déi nei Saison engagéiert. Nieft dem Jempy Drucker gëtt sech virun allem vill vum Simon Geschke an dem Jelle Wallays erwaart. Et hofft een 2021 op 5.000 UCI-Punkten, déi lescht Saison war enttäuschend Verlaf fir déi Responsabel.

D'Ekipp hat zwou Victoire wat net immens vill ass. Et gëllt nees méi Victoiren eranzefueren. Ech probéieren do ee wichtegen Deel vun deem Puzzle ze sinn. Ech hat elo och ee gutt Gespréich mam Cédric Vasseur. Dat ass ee gudde Mann um Manager Posten.

An dofir preparéiert sech d'Ekipp tëscht dem 11. an dem 22. Januar zu Benidorm un der spuenescher Costa Blanca. De Jempy Drucker ass bis elo ganz zefridde mat sengem Wiessel an hofft an den nächste Méint op gutt Resultater.

Op sengem Programm sti fir den Optakt vun der Saison d’Etoile de Bessèges (3.2-7.2.), d’Clasica de Almeria (14.2.), Omloop Het Nieuwsblad (27.2.) a Kuurne-Bréissel-Kuurne (28.2.).