Den Hollänner huet vun engem Platte vum Wout Van Aert profitéiert a gewënnt no enger intensiver Course säi 4. WM-Titel am Cyclocross.

Bei der Elite bei den Häre louch de Fokus virun der Course op deenen 2 grousse Favoritte Mathieu Van der Poel a Wout Van Aert. De Mathieu Van der Poel, deen an dëser Saison bis ewell vun 13 Courssen der ganzer 9 konnt fir sech entscheeden, hat säin Titel zu Ostende ze verdeedegen.

De Wout Van Aert huet sech direkt am 1. Sand-Passage un d'Spëtz gesat an a sengem Wandschiet houng de Mathieu Van der Poel, dee sech net iwwerrasche gelooss huet. Béid Favoritten hu sech awer direkt e Virsprong op all déi aner Coureuren erausgefuer. Am 2. Tour huet sech dunn eng éischte Kéier den Hollännesche Weltmeeschter Mathieu Van der Poel op déi 1. Plaz gesat. Kuerz drop ass de 26-järegen awer am Sand hänke bliwwen an et ass ee Lach tëscht deenen zwee entstanen. Zu allem Iwwerfloss ass de Mathieu Van der Poel dunn och nach gefall, sou dass säi Retard op ronn 15 Sekonnen an d'Luucht gaangen ass.

Am 3. vun 8 Tier war dunn d'Pech op der Säit vum Wout Van Aert. Hien huet sech e Platten agefaangen an esou konnt de Mathieu Van der Poel nees laanscht zéien. Säi Virsprong louch iwwert déi nächsten Tier déi ganzen Zäit bei ronn 6-8 Sekonnen. 2 Tier viru Schluss hat de Belsch Wout Van Aert dunn iwwer 20 Sekonne Retard, sou dass den neien an ale Weltmeeschter Mathieu Van der Poel eng Virentscheedung erausgefuer ass. Dëse Virsprong sollt e bis an d'Zil behalen, sou dass sech den Hollänner mat 37 Sekonne Virsprong op de Van Aert fir déi 5. Kéier als Weltmeeschter ka feieren.

Ëm d'Bronzmedail hu sech de Britt Thomas Pidcock an de Belsche Toon Aerts näischt geschenkt. No enger intensiver kämpferescher Course vu béide Coureure gewënnt um Enn den Toon Aerts Bronzmedail, dat mat engem Retard vu bal enger Minutt a 24 Sekonnen op den neie Weltmeeschter Mathieu Van der Poel. Op déi 4. Plaz fiert den Thomas Pidcock.

Dammen U23 mam Maité Barthels

An der Dammen-U23-Course war mam Maité Barthels och eng Lëtzebuergerin um Sonndeg zu Ostende um Depart. Bei der Victoire vun der Hollännerin Fem van Empel fiert déi 19 Joer jonk Coureuse mat engem Retard vu 7 Minutten an 29 Sekonnen op déi 33. Plaz vun am ganze 37 Starterinnen.

Um Podium stoungen nach d'Hollännerin Aniek van Alphen an d'Ungarin Blanka vas Kata.