No 254,3 km gouf et eng Victoire fir de Kasper Asgreen virum Mathieu van der Poel an dem Greg van Avermaet. De Kevin Geniets gëtt den 52. op 4 Minutten.

27 km virun der Arrivée waren et de Mathieu van der Poel (Alpecin-Fenix), Wout van Aert (Jumbo-Visma) an Kasper Asgreen (Deceuninck-Quickstep) déi sech konnten ofsetzen. An enger Kopp konn de van Aert awer net méi mathalen sou dat just nach déi aner 2 un der Spëtzt vun der Course verbliwwe sinn. Déi 2 Coureuren hu sech net méi anhuele gelooss an um Enn war et de Kasper Asgreen dee sech am Sprint duerchsetze konnt. Drëtten gëtt de Greg van Avermaet (AG2R).

No enger gudder Course gëtt de Kevin Geniets den 52. op ronn 4 Minutten. De Luc Wirtgen kënnt op déi 69. Platz mat engem Retard vun 9 Minutten. De Jempy Drucker an den Tom Wirtgen sinn d'Course net op en Enn gefuer.

Nodeems direkt e puer Co-Equipieren vum Alex Kirsch positiv getest goufen, gouf och de Lëtzebuerger positiv op de Coronavirus getest a konnt soumat net un der Course deelhuelen.

An der Dammecourse huet sech d'Annemiek van Vleuten en solitaire d'Victoire geséchert. D'Christine Majerus ass déi 62. ginn.

De Resumé

Iwwer 254,3 km ass et am Tour des Flandres vun Antwerpen op Oudenaarde gaangen. Am ganzen 19 Koppen a 16 Pavé-Passagen goufen et ze bewältegen.

Am Ufank vun der Course hate sech 5 Coureuren ofgesat a konnten e maximale Virsprong vun 11 Minutten erausfueren. Allerdéngs war et virauszegesinn datt et fir dës Grupp net géif duergoen, fir als éischt bis op d'Arrivée ze kommen. 92 km virun der Arrivée war et de lëtzebuergesche Champion Kevin Geniets (Groupama-FDJ), deen et probéiert hat, sech vum Peloton ofzesetzen. Och aner Coureuren haten nogesat, mee no nëmme 7 km gouf dëse Grupp nees vum Peloton geschléckt.

Eng Chute gouf et 65 km virun der Arrivée am Peloton an där vill Coureure vun Deceuninck-Quick-Step betraff waren an och de Julien Alaphilippe, deen allerdéngs nees séier zeréck an de Peloton fonnt hat. 52 km virun der Arrivée am Paterberg goufen dunn Ecarten am Peloton kreéiert an déi staark Coureuren an d'Favoritte mam Van der Poel, van Aert an Alaphilippe ware vir mat dobäi. Och de Kevin Geniets huet eng staark Leeschtung gewisen a war an engem Grupp hannert de Favoritten.

Et war allerdéngs de Julien Alaphilippe, dee sech vun de Matfavoritten ofsetze konnt an e klenge Virsprong hat. Eng 37 km waren nach ze fueren, wéi sech 6 Coureure mat den Top-Favoritte Mathieu Van der Poel (Alpecin-Fenix), Wout van Aert (Jumbo-Visma) a Julien Alaphilippe (Deceuninck-Quickstep) ofgesat hunn. Mat dobäi waren nach de Marco Haller (Bahrain-Victorious), Dylan Theuns (Bahrain-Victorious) an de Kasper Asgreen (Deceuninck-Quickstep).

26 km virun der Arrivée konnte sech de Kasper Agreen, Wout van Aert a Mathieu van der Poel un der Spëtzt ofsetzen. De Belsch huet awer missen ofräisse loossen, sou datt sech den Dän an den Hollänner eleng un der Spëtzt erëm fonnt hunn. De Grupp hannendrun hat kuerz virun der Arrivée just e Retard vu 25 Sekonnen. Se hu sech awer net méi anhuele gelooss an am Sprint war et iwwerraschend de Kasper Asgreen, dee sech ivirum Mathieu van der Poel duerchsetze konnt. Am Sprint ëm déi drëtte Plaz huet de Greg van Avermaet de Jasper Stuyven geklappt.

No enger gudder Course gëtt de Kevin Geniets den 52. op ronn 4 Minutten. De Luc Wirtgen kënnt op déi 69. Platz mat engem Retard vun 9 Minutten. De Jempy Drucker an den Tom Wirtgen sinn d'Course net op en Enn gefuer.

D'Top10

1 Kasper Asgreen (Deceuninck-Quick Step) 6:02:01
2 Mathieu van der Poel (Alpecin-Fenix) 0:00:00
3 Greg Van Avermaet (AG2R Citroën) 0:00:33
4 Jasper Stuyven (Trek-Segafredo) 0:00:33
5 Sep Vanmarcke (Israel Start-Up Nation) 0:00:48
6 Wout Van Aert (Jumbo-Visma) 0:00:48
7 Gianni Vermeersch (Alpecin-Fenix) 0:00:48
8 Florian Sénéchal (Deceuninck-Quick Step) 0:00:48
9 Anthony Turgis (Total Direct Energie) 0:00:48
10 Dylan Van Baarle (Ineos Grenadiers) 0:00:48