Gendaarme vum Office central de lutte contre les atteintes à l'environnement et à la santé publique (OCLAESP) waren e Mëttwoch den Owend am Asaz.

Dobäi goung et ëm eng Perquisitioun zu Pau am Hotel vun der Vëlosekipp Bahrain-Victorious. Wéi de Parquet vu Marseille an engem Schreiwes matgedeelt huet, wär schonn den 3. Juli eng Virenquête wéinst dem méigleche "Kaf, dem Transport an dem Besëtz vun enger verbuedener Substanz oder Method zur Notzung duerch een Athlet ouni medezinesch Rechtfäerdegung" ageleet ginn. D'Enquête géing dozou déngen, "festzestellen, ob Strofdoten, déi d'Ouverture vun der Enquête gerechtfäerdegt hunn, tatsächlech begaange goufen oder net", huet et weider geheescht.

D'Ekipp hat d'Razzia virdru schonn an engem Schreiwes selwer confirméiert. Deemno wieren den Ekippebus, d'Zëmmere vun de Coureuren a Computeren duerchsicht ginn. Weider wieren eng Partie Dokumenter saiséiert ginn.

De Chef vun der Ekipp, de Milan Erzen, sot géigeniwwer Cyclingnews, datt ee kee Grond genannt kritt hätt, dat géing een awer wuel en Donneschdeg mat Hëllef vun Affekote wëllen erausfannen.

D'Ekipp wäert sech op alle Fall net vum Tour de France zeréckzéien, huet de Milan Erzen betount. D'Coureure sinn dann och en Donneschdeg un den Depart vun der 18. Etapp gaangen.

Et gouf kee Coureur oder Ekippemember festgeholl. D'Ekipp Movistar war wuel am nämmlechten Hotel, déi bloufen allerdéngs verschount vun den Autoritéiten.

Wéi Cyclingnews weider mellt, wieren eng 50 Beamten am Asaz gewiescht.

An der Lescht huet Bahrain-Victorious jo beim Giro a beim Critérium du Dauphiné gutt Resultater realiséiert. Doropshi gouf et béis Zongen, déi behaapt hunn, hir Leeschtunge wiere suspekt. De Milan Erzen huet all Reprochen ofgewisen.