En Donneschdeg war d'Presentatioun vum Tour de France 2022. Fir déi éischte Kéier fueren och d'Dammen e gréisseren Tour duerch Frankräich.

Presentatioun Tour de France 2022 / Rep. Rich Simon

Den Depart vun der 109. Editioun ass freides den 1. Juli mat engem Contre la Montre zu Kopenhagen. Am Ganze ginn 3 Etappen an Dänemark gefuer. Am Tour de France 2022 ginn och nach Etappen der Belsch an an der Schwäiz gefuer.

Fir déi éischte Kéier iwwerhaapt gëtt och den Tour de France fir Dammen dat nächste Joer organiséiert. Den Dammen-Cyclissem gouf an de leschte Joren ëmmer méi populär. A mat der éischter Editioun vum Tour de France Féminin dierft dat och esou weidergoen. Den Depart vun der Dammen-Course ass de 24. Juli op de Champs Élysées. Deen Dag ass op der selwechter Plaz déi leschten Etapp vun den Hären. Fir Damme stinn dann am Ganzen 8 Etappen um Programm. Dat bedeit, datt ee wärend 1 Mount all Dag Cyclissem ka kucken. Den Direkter vum Tour de France, Christian Prud'homme:

"De Mount Juli dat nächste Joer wäert unique ginn. Vum 1. op den 31. Juli gëtt et eng Successioun vun Etappen, esouwuel fir Häre wéi och fir Dammen. Ee Mount, dee komplett dem Cyclissem op héijem Niveau gehéiert. Mat 29 Etappen aus zwou verschiddene Kompetitiounen. 109. Editioun vum Tour de France an éischt Editioun fir Dammen."

D'Damme fueren op den 8 Etappe ronn 1.000 Kilometer. Déi leschten Etapp kënnt uewen op der Planche des Belles Filles un. Fir d'Häre stinn 21 Etappen um Programm mat iwwer 3.300 Kilometer. Fir d'Sprinter gëtt et dat nächste Joer net vill ze huelen. Dem Christian Prud'homme no kommen awer d'Grimpeure voll op hir Käschten:

"D'Vogesen, d'Alpen, de Massif Centralan, d'Pyrenäen. 5 Arrivéeën uewen um Sommet. Zwou méi wéi dat leschte Joer. Mir klammen och méi héich, op 2.640 Meter uewen um Galibier. Et ginn awer manner klasséiert Colle wéi déi leschte Joren. 23 wéi am Joer 2017."

D’Alpen, mat ënnert anerem dem Galibier an och der Alpe d’Huez, gi virun de Pyrenäe gefuer. 21. Etappe stinn um Programm mat 3.328 Kilometer.