Iwwerdeems ass de Lars van der Haar neien Europameeschter bei den Häre ginn. Den Hollänner gewënnt virum Quinten Hermans an dem Michael Vanthourenhour.

Zu Drenthe an Holland ass an der Mëttesstonn bei der Cyclocross-EM d'Marie Schreiber bei der U23-Damme Course un den Depart gaangen. Déi jonk Lëtzebuergerin ass bei der Victoire vun der Hollännerin Shirin van Anrooij virun hirer Landsfra Puck Pieterse eng ganz gutt Course gefuer. Louch d'Marie Schreiber an der Ufanksphas op der 9. Plaz huet si sech am Laf vun der Course bis op déi 6. Plaz no vir geschafft. Um Enn hat d'Cyclistin e Réckstand vun 2 Minutten a 47 Sekonnen op d'Europameeschterin Shirin van Anrooij a klasséiert sech um Zil op der 7. Plaz.

Um 15h stoung dann nach d'Course vun der Hären-Elite um Programm. An och do gouf et eng hollännesch Victoire a Persoun vum Lars van der Haar. Hannert dem neien Europameeschter klasséiere sech gläich 5 Belsch. Zweete gëtt de Quinten Hermans op 25 Sekonnen, dat virum Michael Vanthourenhour op 54 Sekonnen. Lëtzebuerger ware keng um Depart.

E Samschdeg war de Cédric Pries am Asaz. Hie kënnt op déi 31. Plaz bei der U23-Course.