Den 20 Joer ale Lëtzebuerger huet sech op der 4. Manche vum Skoda Cross Cup d'Victoire virum Lorenzo Marasco an dem Scott Thiltges geséchert.

Nëmmen 1 Minutt a 44 Sekonnen hat de Scott Thitges zu la Grandville Retard op de Vainqueur Thijs Aerts. E Sonndeg huet een dem Alzenger d'Motivatioun virum Depart ofgesinn. Zéisseng ass bei naassem Wieder e schwéiere Cross, och wann dacks den Ecart tëscht deene beschte réischt am zweeten Deel vun der Course gemaach gëtt. Séier konnt sech e Sonndeg de Mëtteg e 6er Grupp ofsetzen. Mat dobäi nieft dem Scott Thiltges waren den Espoir-Champion Loïc Bettendorff, Raphaël Kockelmann, Ken Conter an déi 2 Fransouse Boulanger a Marasco. Besonnesch den éischt genannten huet een am Ufank ëmmer nees un der Spëtz gesinn

Am véierten Tour huet sech den Espoir-Champion Loïc Bettendorff awer e bemol vir presentéiert an sech eng kleng Avance op Thiltges a Marasco erausgefuer. De 6er Grupp ass zu deem Ament komplett explodéiert. Et sollt d'Virentscheedung an dëser Course sinn.

Den 20 Joer jonke Coureur huet mat sengem Rhythmus a senger Kraaft deenen anere richteg wéigedoen an och wann dem Scott Thiltges seng Supporter nach emol ugefeiert hunn, sou sollt dat Lach awer ëmmer méi grouss ginn.

Spannend war et bis an de leschten Tour em d'Éireplatzen. Thiltges a Marasco hunn sech op der zweeter Platz ofgewiesselt.
De Loïc Bettendorff konnt bis op en Enn a sengem Rhythmus fueren a gewënnt um Enn souverän. Déi zweete Plaz war fir de Lorenzo Marasco an de Scott Thiltges ass als Drëtte mat op de Podium geklommen. Nächst Woch hunn d'Cyclocross Spezialiste Rendezvous zu Mamer.

Bei de Junioren huet sech e Sonndegmëtteg de Mathieu Kockelmann behaapt. De Lëtzebuerger Cyclist konnt sech virum Noa Berton duerchsetzen, deen am Skoda Cross Cup weider de Leader am General bleift. Op déi drëtt Plaz ass den däitschen Tim Harig gefuer.

D'Masters Course konnt den Dany Papi fir sech entscheeden. De Lëtzebuerger ass zu Zéisseng den Éischte ginn an huet dobäi de Christian Weyland an de Marc-Rolf Indergand hannert sech gelooss.

Fir de Rick Meylender, deen dës Saison bis elo all Course gewonnen huet, ass et bei den Débutants eng weider Victoire ginn. Hie konnt sech virum David Loschetter duerchsetzen. Bei den Dammen huet d'Gewënnerin Isabelle Klein geheescht, dat sech virum Nina Berton an dem Mäité Barthels déi éischt Plaz séchere konnt.