Vun e Samschdeg den Owend 20.10 Auer war de Ralph Diseviscourt bei der Race Across France ënnerwee an ass e Freideg de Moien géint 5.55 Auer ukomm.

De leschte Samschdeg war den den Depart vun der Race Across France. Mat dobäi war de Ralph Diseviscourt. Um Freideg de Moien ass den Ultracyliste no iwwer 2.500 Kilometer als éischte vu der Course op der Côte d'Azur ukomm.

5 Deeg, 9 Stonnen a 45 Minutten huet de Ralph Disevsicourt gebraucht fir d'Race Across France ze gewannen. D'Wiederkonditioune waren zum Deel extrem schwéier. Deelweis Canicule, schro Wiederen, um Ventoux Wandspëtzten vun 100 Kilometer an der Stonn an och nach Schnéi. Dat si Konditiounen, wou déi mécht drop verzichten, fir een Tour mam Vëlo ze maachen. Beim Ralph Diseviscourt ass dat awer net de Fall. Opginn ass ni eng Devise. Dofir behält hien elo no der Course léiwer déi schéi Passagen an Erënnerung.

Ralph Disevsicourt: Mir sinn duerch d'Gorge de la Nesque gefuer. Och d'Gorge de Verdon war schéin. Am Ufank war et awer och schéin an der Bretagne, respektiv an der Normandie, wou mir laanscht de Mont Saint Michel gefuer sinn. Et ass schéi wann een dat ka mam Vëlo erliewen. Virausgesat et passéiert een am Dag an net an der Nuecht.

De Ralph Diseviscourt ass bei senge Courssen op eng Crew ugewisen. Ouni déi ass ee gutt Resultat net méiglech. Ee gutt Zesummespill an der Crew selwer an awer och tëscht der Crew an dem Dizzy ass extrem wichteg. An dat Zesummespill huet bei der Race Across France geklappt.

Ralph Diseviscourt: Doduerch, datt et eng relativ spontan Aktioun war, hate mir vill nei Leit mat dobäi. Ech muss soen, datt dat ganz gutt geklappt huet. An all Deelekipp hate mir erfuere Leit dobäi, déi di nei dann agewisen hunn. Jiddwereen huet och do seng Plaz fonnt a seng Roll gespillt, esou wéi mir eis dat virgestallt hunn.

De Ralph Disevsicourt huet d'Race Across France awer och genotzt, fir Sue fir ee Projet a Südafrika ze sammelen.

Ralph Diseviscourt: Mir sammele Spende fir eng Lëtzebuerger Organisatioun a Südakrifa déi sech KENAKO nennt. Et ass en Urban Farming Projekt. Alleguerten d'Informatioune fënnt een op menger Facebook-Säit. Wann een do spent, kann ee sécher sinn, datt och all Cent bei hinnen ukënnt.

Fir de Ralph Diseviscourt steet elo eng Summerpaus um Programm an dann geet hien am Hierscht normalerweis un den Depart vun der 24 Stonne Weltmeeschterschaft zu Borrego Springs an den USA.