An de leschten Deeg waren nees e puer Lëtzebuerger Futtballer am Ausland am Asaz.

Resultat vun e Méindeg

Nach virun der Halschent loung Mannheim mat 3:1 a Féierung. Knapp eng Minutt nom éischte Gol vum Jannik Sommer (11.), war et de Lëtzebuerger Maurice Deville, deen den 2:0 markéiert huet.

Nom 2:1 fir Steinbach (21.) huet Mannheim an der 23. Minutt mam drëtte Gol geäntwert.

A der zweeter Halschent koum nach een zweeten Treffer vu Steinbach no, kuerz viru Schluss an der 89. Minutt. Um Enn trenne sech béid Ekippen 3:2.
No 25 Spilldeeg a 60 Punkten ass Mannheim weiderhin Tabellenéischten mat enger Avance vun 10 Punkten op den zweeten FC Homburg.

Dëse Freideg an nächste Méindeg si Lännermatcher. De Maurice Deville ass bei der Nationalekipp awer net dobäi, well an der Regionalliga keng Paus ass.

Resultater vum Sonndeg

Den Olivier Thill stoung e Sonndeg bei der 0:1 Néierlag vu senger Ekipp Ufa géint Grozny 90 Minutte laang um Terrain. Den eenzege Gol vum Match hat de Shvets an der 72. Minutt geschoss. Ufa steet aktuell op der zweetleschter Plaz an der Tabell.

De Maxime Chanot an den New York City FC kruten e Sonndeg Besuch vu Los Angeles. Um Enn trenne sech béid Ekippe mat engem 2:2, fir New York hunn de Mitrita an de Ring getraff a fir Los Angeles zweemol de Vela. De Chanot stoung de ganze Match iwwer um Terrain a krut an der 88. Minutt Giel.

Resultater vum Samschdeg

Den SV Elvesrberg ass e Samschdeg de Mëtteg op déi 2. Ekipp vun der TSG Hoffenheim getraff. Um Enn konnt d'Ekipp vum Aldin Skenderovic eng 1:0-Victoire feieren - de Lëtzebuerger huet allerdéngs missen den Erfolleg vu senge Kollege vun der Bänk aus beobachten.

Beim 1:1-Remis tëscht Seraing a Virton waren direkt e puer Lëtzebuerger am Asaz. Den Anthony Moris huet d'Partie vun Ufank u bestridden an och den Aurélien Joachim souwéi de Lucas Prudhomme stoungen an der Start-11. De Lëtzebuerger Stiermer Joachim gouf fir den 2. Duerchgang ersat, ma déi aner zwee hunn allebéid duerchgespillt.

Resultater vum Freideg

Den FC Metz wënnt e Freideg den Owend an der Ligue 2 mat 3:0 géint den FC Chamois Niortais. Den Diallo, de Gakpa an de Boulaya hunn d'Goler geschoss. De Lëtzebuerger Nationalspiller Laurent Jans huet allerdéngs déi 90 Minutte missen op der Bänk Plaz huelen.

De Christopher Martins huet e Freideg den Owend dann awer 90 Minutte fir seng Ekipp Troyes an der Ligue 2 gespillt. D'Ekipp vum Lëtzebuerger kënnt um Enn awer net iwwer een 0:0 eraus. Den Touzghar hat fir Troyes an der 14. Minutt een Elefmeter verschoss.

De Vincent Thill konnt sech dann awer e Freideg an der 3. franséischer Liga iwwer eng Victoire freeën. Seng Ekipp wënnt nämlech mat 3:0 géint US Quevilly. De jonke Lëtzebuerger huet an der 49. Minutt fir d'3:0-Schlussresultat gesuergt.