Am zweete Match gewënnt Frankfurt mat engem knappen 1:0 géint Nürnberg. An Italien verléiert d'Juventus Turin ganz iwwerraschend mat 0:2 géint Genua.

An der Bundesliga stoungen haut gläich 3 Matcher um Programm, an England ware Liverpool an Chelsea am Asaz an an Italien huet d'Juventus mol nees eng kéier verluer.

Bundesliga

Bayern München - Mainz 6:0

An engem ganz eesäitege Match hunn d'Bayern Mainz iwwerrannt an hinnen nom Aus an der Champions League keng Chance gelooss. Schonn no den éischte 45 Minutten stoung et 3:0 an et konnt ee fir d'Mainzer just hoffen dat d'Bayern net bis zum Schluss duerchzéien. Et ware nëmmen 3 Minutte gespillt, do hat et schonn déi éischt kéier gerabbelt. No enger Flank vum Alaba huet de Lewandowski um éischte Potto säi Fouss dohinner gehalen an stoung 1:0. An der 33. Minutt huet de Goretzka de Ball mat der Broscht op de James ofgeluecht an deen huet de Ball riets an den Eck geschoss. Nëmme 6 Minutten méi spéit war et de Coman dee vu lénks an d'Mëtt gezunn ass an de Ball an de laangen Eck geschoss huet.

Och no der Paus ass et net besser gi fir Mainz wëll et war déi 51. Minutt wéi de James säin zweete Gol an der Robben-Manéier schéisse konnt. De James hat es awer nach net genuch a konnt 4 Minutte méi spéit no Pass vum Müller de 5:0 schéissen a soumat och säin éischten Hattrick an der Bundesliga. No 70 Minutten huet dann och den Davies eng kéier dierfen an huet de 6:0 geschoss an dat nodeems de Müller am Gol nach eng staark Parade géint de Lewandowski gewisen hat.

Leverkusen - Bremen 1:3

Géint Bremen huet Leverkusen doheem missen e Réckschlag astiechen. Leverkusen huet mat ganz vill Ballbesëtz ugefaangen mee konnt sech dorausser keng richteg Golchancen erspillen. Mat der éischter Konterchance huet Bremen an der 13. Minutt dann direkt den 1:0 markéiert. Den M. Eggestein huet eng fantastesch Pass op de Kruse an d'Spëtzt gespillt an dee konnt de Hradecky mat engem flaache Schoss iwwerwannen. Virun der Paus konnten d'Gäscht dann nach op 2:0 erhéijen. An der 37. Minutt konnt de Kruse op de Rashica ofleeën an dee konnt de Ball am Filet ënnerbréngen.

No der Paus huet Leverkusen Drock op den Uschlossgol gemaach mee konnte sech an der éischter Phase net dofir belounen. No 75 Minutten war et dann awer sou wäit wéi de Bailey en herrleche Fräistouss aus 19 Meter mat Hëllef vum Potto an de Gol geschoss huet. Leverkusen wollt dunn onbedéngt den Ausgläich mee kruten an der 95. Minutt no engem Konter den 1:3 duerch de Kruse geschoss an de Match war entscheet.

Frankfurt - Nürnberg 1:0

Nürnberg huet an der éischter Halschent alles probéiert fir mat de Frankfurter mat ze halen mee géint déi staark Individualisten waren se dann awer ënnerleeën. Virun allem de staarke Kostic konnt bei de Frankfurt an den éischte 45 Minutten iwwerzeegen. An der 31. Minutt huet de Jovic perfekt fir de Kostic duerchgestach, deen huet gesinn dat den Hinteregger an der Mëtt matgelaf war an deen konnt ouni Problemer den 1:0 schéissen.

Och no der Paus war Frankfurt déi besser Ekipp mee huet direkt e puer Chance leie gelooss fir dëse Match ze entscheeden. An der 89. Minutt huet de Rebic no enger Pass vum Haller vir d'Virentscheedung gesuergt mee d'Bibiana Steinhaus huet de Gol no Ofsproch mam VAR wéinst enger Abseitspositioun nees ofgepaff. Domadder gewënnt Frankfurt dann awer just mat engem knappen 1:0 géint Nürnberg.

Premier League

Fulham - Liverpool 1:2

Eng emkämpfte Victoire gouf et fir Liverpool zu Fulham wou den Tabllenzweeten sech géint den Tabellen-19. immens schwéier gedoen huet. Nodeems de Mané déi rout an der 26. Minutt a Féierung konnt bréngen, war et de Babel deen an der 74. Minutt azsgläiche konnt. Nëmme 7 Minutten drop gouf et dann awer Eelefmeter fir Liverpool an deen huet de Milner am Gol ënnerbruecht.

Everton - Chelsea 2:0

Den FC Everton konnt sech e Sonndeg iwwerraschend mat 2:0 géint den FC Chelsea duerchsetzen. De Richarlison hat an der 49. Minutt de Score opgemaach, ier de Sigurdsson an der 72. Minutt fir d'2:'-Schlussresultat suerge konnt.

Ligue 1

Lyon - Montpellier 3:2

Mat engem knappen 3:2 gewënnt Lyon géint Montpellier a bleift 3. an der Tabell. Fir Lyon konnten den Terrier (12.'), Dembélé (58.') an Aouar (86.') d'Goler markéieren. Fir Montpellier hunn de Mollet (36.') an de Camara (90.') getraff.

La Liga

Betis Sevilla - Barcelona 1:4

Betis Sevilla krut e Sonndeg den Owend am Estadio Benito Villamarin Besuch vum Tabelleleader, dem FC Barcelona. Géint d'Katalane war dann och net vill Kraut gewuess. An der 18. Minutt huet de Messi een herrleche Fräistouss an de Gol geschoss, ier hie kuerz virun der Paus op 2:0 erhéije konnt. An der zweeter Hallschent war et dunn de Suarez, deen op 3:0 gestallt huet. Sevilla konnt an der 82. Minutt zwar nach eemol verkierzen duerch de Loren, mä de Messi huet nëmmen 3 Minutte méi spéit nees den alen Avantage hiergestallt, esou dass et mat engem klore 4:1 op en Enn geet. An der Tabell hu si elo 10 Punkten Avance op Atlético Madrid an 12 op Real Madrid.

Serie A

Genua - Juventus 2:0

Um 28. Spilldag verléiert d'Juventus ouni de Cristiano Ronaldo ganz iwwerraschend mat 0:2 géint Genua. Fir Genua konnten de Sturaro (72.') an de Pandev (81.') déi entscheedend Goler schéissen.

AC Mailand - Inter Mailand 2:3

Et war ee richteg spannenden Derby tëscht den zwou groussen Ekippe vu Mailand, wou Inter awer besser ewechkomm ass. Si konnte schonns fréi duerch de Vecino a Féierung goen an an der zweeter Hallschent konnt den de Vrij esouguer mam Kapp op 2:0 stellen. Du konnt den AC Mailand awer op 1:2 verkierzen duerch de Bakayoko. De Lautaro Martinez konnt dunn awer per Eelefmeter den 3:1 markéieren. Den 2:3 vum Musacchio sollt dunn och näischt méi hëllefen, esou dass Inter sech um Enn duerchsetze konnt.