Et ass en Hobby vu ville Leit, an der Vakanz en Taucherbrëll an en Schnorchel unzedoen, fir d'Ënnerwaasserwelt ze bestaunen.

Wann een eppes Intressantes gesäit a wann ee bis ënnerwaasser ass, geet engem séier d'Loft aus. Et gëtt allerdéngs eng Technik, déi ee benotze kann, wou een et packt, méi laang ze tauchen. Déi nennt een Apnoe.
En Apnoedaucher oder Free Diver, wéi en och nach genannt gëtt, otemt viru sengem Dauchgang an a benotzt, par Rapport zum Dauche mat der Fläsch, nëmmen een eenzegen Otemzuch, fir ënner Waasser ze bleiwen.

Hei zu Lëtzebuerg bidden DiveWinns eng Formatioun un a bilden Apnoedaucher aus. Bei dësem Sport muss een de Kierper allerdéngs net iwwerwannen, fir ze ootmen, mä et gëtt eng Technik, déi een uwende kann.

Et misst ee säin Kierper kenneléieren a verstoen kënnen, fir ze wëssen, wisou een otemt. Nom Anootme kritt de Kierper iergendwann e Signal, nees auszeootmen. Dat geschitt genau dann, wann de Kierper ze vill Kuelendioxid huet, sot de Stéphane Ewerling.

Ier een an d'Waasser geet, muss een ofschalten. Dat gëtt iwwert eng speziell Otemtechnik gemaach, fir de Kierper an de Geescht ze entspanen. Déi Übunge kann een och zu all Moment uwenden, fir de Stress vum Alldag ofzebauen.

Déi Otemübunge kann een zu all Moment uwenden, a Stresssituatiounen, viru Reuniounen, oder wann een nervös ass, fir de Kierper ze berouegen, esou de Stéphane Ewerling weider.

Spéitstens nom 1 Cours kann en Ufänger mat dëse speziellen Technike scho bis zu 1 Minutt d'Loft unhalen.

Et sinn och zousätzlech Fläschendaucher am Asaz, fir am Noutfall kënnen anzegräifen, mä bis elo ass et nach zu kengem gréisseren Tëschefall komm.

Och am Apnoesport ginn et verschidden Disziplinnen, wéi Streckendauchen oder Déifdauchen, wou ee mat an ouni Flosse kann un den Depart goen.

Den Alexey Molchanov hält am Déifdauchen mat der DuoFloss a konstantem Gewiicht de Weltrekord vun 130 Déiftemeter. Den Russ huet, fir dëst ze realiséieren, am Deans Blue Hole op den Bahamas 3 Minutten a 55 Sekonnen d'Loft ugehalen. Einfach nëmmen impressionnant.