Liverpool klappt Chelsea am Spëtzematch an der Premier League mat 2:0 a bleift un der Spëtzt, Frankfurt verléiert iwwerdeems iwwerraschent géint Augsburg.

Ënnert anerem stoung an der Premier League de Match tëscht dem FC Liverpool an dem FC Chelsea um Programm, Manchester City hat et am Kampf ëm den Titel mat Crystal Palace ze dinn.

Bundesliga

TSG Hoffenheim - Hertha BSC Berlin 2:0

D'Lokalformatioun vun Hoffenheim wollt sech weider Hoffnungen op Europa maachen, ma dofir war eng Victoire géint d'Hertha vu Berlin Pflicht.

Hoffenheim hat och de bessere Start an de Match. An der 29. Minutt war et den Däitschen Amiri, dee fir d'Féierung suerge konnt, dëst mat engem Schoss aus der Distanz. D'Männer aus der Däitscher Haaptstad hu sech awer net opginn. An der 35 Minutt hat de Plattenhardt et probéiert, ma de Baumann konnt dëse Versuch awer paréieren.

Nom Säitewiessel war et de Schulz, dee säi Gléck probéiert hat, säi Schoss goung awer laanscht de Potto. De Kaderabek hat an der 72. Minutt d'Entscheedung um Fouss. No engem Corner koum den Tschech mam Kapp un de Ball, ma de Jarstein konnt dat ronnt Lieder mat engem super Reflex ofwieren. An der 75. Minutt sollt d'Entscheedung dann awer zu Gonschte vun Hoffenheim falen. No enger Flank vum Schulz stoung de Reis Nelson genee richteg a konnt de Ball am Filet ënnerbréngen. Den Arbitter hat sech d'Aktioun nach eng Kéier um Video ugekuckt, ma um Enn sollt et awer ee reguläre Gol gewiescht sinn.

Soumat konnt Hoffenheim doheem mat 2:0 géint d'Hertha gewannen.

Fortuna Düsseldorf - Bayern München 1:4

No dem 3:3 am Allersmatch wollt Düsseldorf och an der Réckronn Bayern eppes entgéintstellen. Dëst sollt awer nëmme bedéngt fonctionnéieren. No enger véierel Stonn war et de Coman, dee no enger Virlag vum Gnabry op 1:0 fir d'Münchener stelle konnt. Bayern München hat net vill ubrenne gelooss. De Coman war gutt opgeluecht a sou konnt de jonke Fransous kuerz virun der Paus an der 41. Minutt och op 2:0 erhéijen.

Nom Säitewiessel de Schock fir déi Münchener. An der 53. Minutt huet de Manuel Neuer missen ausgewiesselt ginn a gouf vum Ullreich ersat. Den däitsche Rekordmeeschter war awer net geschockt, a sou war et an der 55. Minutt de Gnabry, deen no senger Virlag zum 1:0 och nach selwer markéiere konnt. Duerno gouf et eng Zeen, déi sech den Arbitter nach eng Kéier am Video ugekuckt huet, hien huet decidéiert, dass de Martinez no enger Flank de Ball mat der Hand gespillt hat, an soumat konnt de Lukebakio per Eelefmeter markéieren an op 1:3 verkierzen. Um Enn konnt de Goretzka nach op 4:1 fir Bayern stellen, a soumat iwwerhëlt de Rekordmeeschter erëm d'Spëtzt an der Bundesliga.

Eintracht Frankfurt - FC Augsburg 1:3

Frankfurt hat iwwerdeems eng iwwerraschend Néierlag missen astiechen. Nodeems d'Lokalekipp fréi an der 15. Minutt mat 1:0 a Féierung goe konnt, huet Augsburg sech awer zeréckgekämpft, a wollt wichteg Punkte géint den Ofstig sammelen. An der 31. Minutt war dem Richter den 1:1 gelongen, éier den Augsburger kuerz virun der Paus esouguer nach de Match dréine konnt a seng Faarwe mat 2:1 a Féierung brénge konnt.

Nom Säitewiessel konnt Augsburg sech weider gutt géint d'Eintracht vu Frankfurt wieren, a sou ass et dem Tabelle-4. net gelongen zeréck an de Match ze kommen. Kuerz virum Schluss vun der Partie war et de Gregoritsch, dee fir d'Entscheedung suerge konnt, dëst an der 84. Spillminutt.

Soumat sammelt Augsburg wichteg Punkten am Kampf géint den Ofstig, Frankfurt muss sech iwwerdeems erëm verbessere, fir sech fir Europa ze qualifizéieren.

Premier League

Crystal Palace - Manchester City 1:2

Am Duell ëm den Titel war  Manchester City gewëllt, Liverpool ënner Drock ze setzen. Dofir war eng Victoire géint Crystal Palace awer ee Muss.

De Favorit vu Manchester war och séier am Match, a sou konnt de Raheem Sterling an der 15. Minutt fir d'Féierung suergen. Bis zur Paus waren d'Männer aus Manchester dominant, ma et sollt hinnen awer kee Gol méi virun der Paus geléngen.

No der Paus war et erëm de Sterling, deen op 2:0 stelle konnt. Fir Crystal Palace ass et just nach fir den Uschloss duergaangen, dëst duerch de Milivojevic an der 81. Minutt. Domat bleift City an der Course ëm den Titel fir mat dobäi.

FC Liverpool - FC Chelsea 2:0

No der Victoire vu Manchester City war Liverpool gefrot, fir wichteg Punkten fir den Titel ze sammelen. Dëst sollt de Männer vum Jürgen Klopp och geléngen.

Liverpool war déi optesch besser Ekipp, ma an der éischter Hallschent sollt hinnen awer kee Gol geléngen.

Nom Säitewiessel war et dann awer de Sadio Mané, dee fir d'Féierung suerge konnt. No enger Flank vum Henderson stoung de Mann aus dem Senegal um zweete Potto ganz alleng a konnt de Ball mam Kapp iwwert d'Linn drécken. Nëmmen zwou Minutte méi spéit koum et dann zum Highlight vum Match. No engem Solo vum Salah hat den Ägypter et aus grousser Distanz probéiert. De Ball war esou plazéiert an den Eck geschoss, dass de Kepa keng Chance hat de Ball ofzewieren. Soumat iwwerhëlt Liverpool erëm d'Spëtzepositioun an der Premier League.

Ligue 1

Saint-Etienne - Girondins Bordeaux 3:0

Nodeems an der éischter Hallschent keng vu béiden Ekippe markéiere konnt, war et Saint-Etienne, déi sech an der zweeter Hallschent staark presentéiere konnten. An der 55. Minutt konnt de Khazri den 1:0 markéieren. Duerno war et den Debuchy, dee fir d'Schlussresultat suerge konnt. Den éischter defensiv orientéierte Spiller konnt an der 74. op 2:0 stellen, éiert hien an der 90. den 3:0 markéiere konnt.

Lille - PSG 5:1

Serie A

Chievo Verona - SSC Neapel 1:3

An der italienescher Serie A bleift Napoli weider op der zweeter Plaz vun der Tabell. Schonn no 15 Minutte konnt de Koulibaly den 1:0 mam Kapp markéieren. Nom Säitewiessel konnt de Milik mat engem Schoss aus der Distanz op 2:0 erhéijen, éiert den Defenseur Koulibaly säin zweete perséinleche Gol markéiere konnt, dëst op e Neits no engem Corner, ma dës Kéier hat hie mam Fouss zougeschloen. Dem Cesar war an der Nospillzäit mat engem schéine Schoss just nach den 1:3-Uschloss gelongen.