Den Oli Thill war bei der 1:2-Néierlag vu sengem Veräin FC Ufa an der russescher Premier League net am Asaz.

Samschdeg

De Maurice Deville stoung bei der nächster Victoire vu Waldhof Mannheim op en Neits déi gesamt Spillzäit iwwer um Terrain a konnt senger Ekipp an der Regionalliga Südwest bei 1:0-Succès iwwer Wormatia Worms hëllefen. Mat dësem Erfolleg ass de Lëtzebuerger mat sengem Veräin fréizäiteg an déi 3. däitsch Liga opgestigen.

Bei der 2:1-Victoire vu Pirmasens géint déi 2. Ekipp vum VfB Stuttgart ass de Florian Bohnert fir de Kont vum 30. Spilldag an der Regionalliga Südwest an der 67. Spillminutt ausgewiesselt ginn.

Och den SV Elversberg huet e Samschdeg de Mëtteg an der Regionalliga gespillt. An der Partie géint d'Eintracht Stadtallendorf konnt dem Aldin Skenderovic seng Ekipp mat 6:2 gewannen. De Lëtzebuerger ass no der Halbzeit-Paus agewiesselt ginn, krut an der 80. déi giel an an der 82. Minutt déi giel-rout Kaart gewisen an huet fréizäiteg missen d'Spillfeld verloossen.

Een onglécklechen Optrëtt hat de Gerson Rodrigues a Japan mat sengem Club Jubilo Iwata. D'Ekipp vum Lëtzebuerger Nationalspiller huet net just mat 0:1 géint Nagoya Grampus de Kierzere gezunn, d'Lëtzebuerger Nowuesstalent ass och mat enger giel-rouder Kaart vum Terrain geflunn - dat an der 4. Minutt vun der Nospillzäit. Kuerz viru Schluss vun der Partie, an der 87. Spillminutt, hat de Rodrigues eréischt déi giel Kaart gesinn. No der 2. huet den Arbitter hien du fréizäiteg an d'Dusch geschéckt.

Bei der 1:2-Néierlag vum FC Ufa an der russescher Premier League géint Arsenal Tula war den Oli Thill net am Asaz.

Freideg

A Schweden konnt sech de Lars Gerson mam IFK Norrköping géint Falkenbergs FF mat 4:3 duerchsetzen. Nodeem si 3:2 vir waren, krut de Larsson, deen 2 Goler markéiert huet, déi zweet giel Kaart gewisen an Norrköping huet déi lescht 18 Minutten an Ënnerzuel gespillt. De Sylisufaj konnt dëst an der 87. Minutt ausnotzen a markéiert den Ausgläich. Ma dem Lars Gerson säi Teamkolleg aus der Defense Larsen, deen an der 20. Minutt e Selbstgol geschoss hat, konnt an der 93. Minutt de wichtegen 4:3 markéieren an esou déi éischt Victoire no 4 Spilldeeg an dëser Saison fir seng Ekipp sécheren.

Gi mer an déi zweet Divisioun a Frankräich. Hei konnt sech den FC Metz mat 2:0 zu Ajaccio duerchsetzen, dat no Goler vum Boye (54') a Niane (76'). De Laurent Jans souz de ganze Match iwwer op der Bänk. All  Detailer vum Match bei de Kollege vu 5Minutes. En 3:0 gouf et och auswäerts fir de Christopher Martins mat Troyes, déi no Goler vum  Mbeumo (12'), Pele (39') an Toughar (93') zu Llorient konnte gewannen. De Lëtzebuerger huet de ganze Match gespillt a krut an der 80. Minutt eng giel Kaart. Metz steet do weider no 33 Spilldeeg op der éischter Plaz, datt mat 71 Punkten an engem Virsprong vu 6 Punkten op Stade Brest a vun 13 op Troyes op Plaz 3.

An der National verléiert den FC Pau ouni Vincent Thill 2:3 bei Lyon Duchère. De Lëtzebuerger huet opgrond vun enger Spär wéinst ze ville giele Kaarte gefeelt.

Da war den Enes Mahmoutovic an England mat Middlesbrough II am Asaz, dat géint Stoke City II. De Lëtzebuerger huet de ganze Match an der Defense gespillt. All d'Goler vum Match, deen 2:2 ausgaangen ass, sinn an der zweeter Hallschent gefall.

Donneschdeg

An der däitscher Regionalliga Südwest huet déi zweet Ekipp vum 1. FSV Mainz 05 auswäerts mat 1:2 géint déi zweet Ekipp vu Freiburg verluer. De Leandro Barreiro stoung fir Mainz vun Ufank un um Terrain a gouf an der 73. Minutt ausgewiesselt.