Um 30. Spilldag an der däitscher Futtball-Bundesliga konnt sech den FCB géint Werder behaapten. Stuttgart koum beim 0:6 zu Augsburg zolidd ënner d'Rieder.

An der Futtball-Bundesliga konnt sech Hoffenheim auswäerts bei Schalke behaapten, huet RB zu Mönchen Gladbach gewonnen, konnt Bayern an der Course ëm den Titel virleeën, huet Mainz de Maintien gefeiert an ass Stuttgart zu Augsburg zolidd ënner d'Rieder komm.

Iwwerdeems koum d'Nouvelle, datt Stuttgart no der 0:6-Néierlag säin Trainer erausgehäit huet.

International huet sech d'Juve fir déi 8. Kéier hannereneen den Titel gekroopt a City konnt Revanche géint Tottenham huelen.

Den Iwwerbléck vun de Samschdeg-Partien aus der Bundesliga

Schalke 04 – TSG Hoffenheim 2:5

Fir S04 ass dës Saison eng, fir ze vergiessen. Waren d’Ambitioune virun der Campagne héich a wollt een Europa erreechen, esou batter ass et fir d’Kinneksblo, datt si elo géint den Ofstig musse kämpfen. Mat der TSG ass an der Owespartie awer een zolitte Géigner an d’Veltnis-Arena gereest an dat krut S04 och direkt ze spieren.

Et waren nämlech d'Sinsheimer, déi nom 1. Duerchgang mat 2:0 a Féierung louchen. Dat duerch Goler vum Belfodil an der 25. an dem Kramaric an der 45. Spillminutt. No der Paus goung et mat de Goler monter weider, well Schalke an der 60. Minutt no engem Eelefter vum Caligiuri den Ofschlosstreffer markéiere konnt. Ma just 5 Minutte méi spéit koum d'Reaktioun vun der TSG, dat wéi den Ex-Schalker Szalai op 3:1 gesat huet - an dat war nach net alles.

An der 73. Minutt huet sech den Amiri an d'Lëscht vun de Buteuren agereit an duerno war et 10 Minutte viru Schluss op en Neits de Belfodil, dee fir seng Faarwe markéiere konnt.

Dem Burgstaller säi Gol an der 90. Spillminutt huet näischt méi un der batterer Néierlag fir Kinneksblo geännert.

M’Gladbach – RB Leipzig 1:2

Mat enger Victoire fir Gladbach wollten d’Fohlen am Heemmatch géint Leipzig erëm an d’Top-4 sprangen. RB ass den Ament awer richteg gutt drop a wollt auswäerts déi 5. Victoire hannerenee kloermaachen.

Déi éischt Véirelstonn war vun enger Arbittesch-Decisioun gepräägt. Den Onparteieschen hat nämlech fir Leipzig op de fatale Punkt gewisen. De VAR huet d'Spillzeen kontrolléiert a gréng Luucht ginn, fir den Eelefter auszeféieren. Et war den Halstenberg, dee sech der Saach fir RB ugeholl huet a propper an der 17. Minutt verwandele konnt. Am weidere Verlaf vum Match huet RB d'Partie gréisstendeels geréiert a fir d'Borussen net vill zougelooss. Deemno goung et mat engem 1:0 an d'Paus.

Huet zwee Goler markéiert: de Marcel Halstenberg vun RB Leipzig. / © afp

Nom Téi koum Gladbach besser an de Match an huet virum eegene Public der Partie wëllen de Stempel opdrécken. Dëst ass awer net wierklech gelongen, well ee Gol ass bei de Beméiunge vun der Borussia net erausgesprongen. An der 53. Minutt war et dunn op en Neits den Halstenberg, dee markéiere konnt - déi Kéier no enger flotter Ballzirkulatioun vun RB. D'Äntwert vun de Fohlen huet net laang op sech waarde gelooss, well knapps 10 Minutte méi spéit huet et gerabbelt. De Fransous Pléa konnt den 2:1 schéissen. Wien elo gemengt hat, datt Gladbach de Match dréine géif, huet sech geiert. Vill méi waren et d'Gäscht déi op ee weidere Gol gedréckt hunn, ma um Enn blouf et awer beim 2:1-Succès vun RB.

Bayern München – Werder Bremen 1:0

Mat Bremen hat den FCB eng Ekipp virun der Broscht, déi eng ganz flott Campagne bis elo spillt an déi um Enn vun der Saison onbedéngt op enger Europäesch Plaz wëllt stoen. Bayern wollt iwwerdeems an der Course ëm den Titel virleeën an d’Borussen, déi e Sonndeg spillen, ënner Drock setzen. An den éischte 45 Minutten ass allerdéngs op béide Säite kee Gol gefall.

© afp

Och am 2. Duerchgang sollte keng Goler falen, ma bei Werder huet awer ee missen dusche goen: den Veljkovic. De Werderaner huet no senger 2. gieler Kaart den Terrain misse verloossen a vun deem Ament un houng den 1:0 fir d'Bayern an der Loft.

Bremen hat zu München gutt dergéint gehalen. / © afp

15 Minutte viru Schluss war et du sou wäit. De Süle huet sech aus der 2. Rei een Häerz geholl an huet zolidd ofgezunn. Dat ronnt Lieder gouf nach ofgefälscht an ass am Filet vum Werderaner Gol gelant. Am weidere Verlaf vun der Partie konnt Bremen net méi äntweren a Bayern kee weidere Gol méi markéieren. Deemno blouf et beim 1:0 a bei weideren dräi Punkten an der Tabell.

Den Niklas Süle gëtt vu senge Matspiller nom Gol gefeiert. / © afp

Mainz 05 – Fortuna Düsseldorf 3:1

D’Rheinhessen kruten et doheem mat der Iwwerraschungsekipp vun der Saison, der Fortuna vun Düsseldorf, ze dinn. Dem Mainzer Trainer Sandro Schwarz seng Formatioun wollt awer virun eegene Public een Dräier kloermaachen. No 36 Sekonnen krut Düsseldorf well déi kal Dusch, dat wéi de Mainzer Mateta op 1:0 setze konnt. D'Äntwert vun der Fortuna huet net laang op sech waarde gelooss, wéi de Lukebakio an der 19. Minutt ausgläiche konnt. Deemno goung et mat engem verdéngten 1:1 an d'Paus.

Kuerz virun der Stonn Spillzäit krut d'Fortuna een Eelefter zougesprach, deen de Buteur Lukebakio awer un de Potto gesat huet. Mainz blouf also esou nach am Match a konnt doropshi selwer markéieren, dat an der 67. Spillminutt duerch den Onisiwo - de Mainzer Stiermer gouf no enger flotter Aktioun an der Mëtt fräigespillt an huet souverän verwandelt.

An der 87. Spillminutt ass dunn d'Entscheedung gefall, wéi de Mateta mat sengem Gol de Sak zougemaach huet. D'Rheinhessen konnten deemno eng 3:1 doheem géint d'Fortuna feieren an de Maintien an der Bundesliga domat sécheren.

Bayer Leverkusen – Nürnberg 2:0

Fir nach eng Chance op déi europäesch Plazen ze halen, huet Leverkusen misse géint Nürnberg doheem gewannen. Ma de Club wollt awer punkten, schliisslech ass a punkto Ofstig nach näischt entscheet. Deemno konnt ee sech eng spannend Partie erwaarden, ma bis op 70% Ballbesëtz fir d'Werkself kruten d'Spectateuren an der BayArena net vill ze gesinn. Nürnberg stoung hannendra gutt gestaffelt a Leverkusen hat offensiv net déi néideg Duerchsetzungskraaft - 0:0 an der Paus.

Am 2. Duerchgang konnt d'Heemekipp dunn awer treffen. An der 61. Spillminutt huet den Alario mam Kapp op 1:0 gesat an dat war och verdéngt, well Leverkusen sech ëmmer méi Golchancen erausgespillt huet. Dräi Minutte viru Schluss huet de Volland mat sengem 2:0 fir Entscheedung gesuergt.

Augsburg – Stuttgart 6:0

Fir Stuttgart gëtt et an der Lutte ëm den Ofstig ëmmer méi knapp. Zanter méi wéi 5 Matcher konnt d’Ekipp vum Mario Gomez net méi wannen, dofir wieren 3 Punkte géint den Noper Augsburg immens wichteg. Ma Augsburg wollt doheem awer d’Punkten net sou einfach ewechginn an huet an der 11. Spillminutt well duerch de Khedira markéiert. Keng 10 Minutte méi spéit konnt den Hahn op 2:0 erhéijen. Stuttgart war geschockt an huet am Stil vum engem Ofsteiger ouni Bëss gespillt.

Fir de VfB koum et an der 29. Spillminutt dunn nach méi déck, dat wéi de Max op 3:0 erhéicht huet. Stuttgart war iwwerhaapt net am Match an den Trainer Weinzierl huet an de Kabinnen an der Paus missen déi richteg Wierder fannen, fir d'Ekipp opzepäppelen.

Dat schéngt awer guer net Fall gewiescht ze sinn, well d'Goler si weider gefall. De Richter huet fir den FCA de 4:0 geschoss an de Max huet kuerz drop de 5:0 fir d'Heemekipp markéiert. Duerno war et op en Neits de Richter, dee markéiert huet an de Score op 6:0 fir Augsburg eropgeschrauft huet - Stuttgart war K.O. an déi éischte Supporter hu fréizäiteg de Stadion verlooss.

Augsburg huet am weidere Verlaf vun der Partie ee Gank zeréckgeschalt, soudatt et beim 6:0 bliwwen ass.