An den Halleffinallen e Mëttwoch ka sech den F91 mat 3:1 géint de Progrès behaapten an d'Etzella klappt Mäertert-Waasserbëlleg 3:0.

E Mëttwoch den Owend stoungen d'Halleffinallen an der Coupe de Luxembourg um Programm. Mäertert-Waasserbëlleg aus der Éierepromotioun hat d'Etzella vun Ettelbréck aus der BGL Ligue op Besuch a war där kloer mat 0:3 ënnerleeën. Nidderkuer huet mussen op Diddeleng reesen an no deem Duell tëscht den zwee Veräiner aus der BGL Ligue huet sech den F91 iwwer eng 3:0-Victoire gefreet.

D'Finall vun der Coupe de 26. Mee heescht also F91 Diddeleng géint Etzella Ettelbréck.

Viru béiden Halleffinalle gouf et eng Gedenkminutt fir de verstuerwene Grand-Duc Jean.

Mäertert-Waasserbëlleg - Etzella 0:3

Bei ongemittlechen Schmuddelwieder a ganz schwieregen Terrainsverhältnisser hat d'Lokalekipp, déi fir d'éischt an der Veräinsgeschicht an der Halleffinall vun der Coupe de Luxembourg stoung, d'Méiglechkeet op eng richteg Sensatioun - 25 Joer no der Fusioun vun de Clibb vu Mäertert a Waasserbëlleg. Nodeems een ewell den Noper Rouspert an der Véierelsfinall geklappt hat, war dat d'Haaptgespréichsthema an den Dierfer ...

Ma d'Hoffnung op d'Finall war net vu laanger dauer, well an der 19. Minutt huet de Bidon riets vun ca. 25 Meter op de Gol geschoss a säi kecke Schoss ass an dem Vogel säi rietse Wénkel gefall: 1 zu 0 fir d'Etzella.

No ronn enger hallwer Stonn war de Match richteg lancéiert an dunn huet de Bidon an der 31. fir d'zweet zougeschloen: De Schlesser ass ganz gutt op riets fräigespillt ginn, hien zitt op d'Linn a gëtt de Ball stramm an d'Mëtt an de Strofraum, wou de Bidon nëmme brauch de Fouss dohinner ze halen, fir de Ball an de Filet ze setzen.

Mat där verdéngter 2:0-Féierung vun der Etzella goung et an d'Paus. D'Gäscht haten einfach méi vum Spill a matten an där Period, an där d'Lokalekipp gedréckt huet, huet de Bidon mat sengem zweet perséinleche Gol zougeschloen.

Och an der zweeter Hallschent waren et d'Ettelbrécker, déi dominéiert hunn - bei Wiederkonditiounen, déi ëmmer méi schwéier goufen. An awer hate 592 Leit de Wee op de sauer-Terrain fonnt.

Si hu gesinn, wéi den Arnold an der 67. fir den 3:0 gesuergt huet: Den Arnold ass ganz schéin op riets vum Holtz fräigespillt ginn, hien ass op de Gol gezunn a mat engem placéierte Schoss huet hien dem Vogel am Gol keng Chance gelooss. E schéine Konter vun de Gäscht - an eng Virentscheedung.

Diddeleng - Nidderkuer 3:1

Diddeleng klappt an der Halleffinall Nidderkuer mat 3:1
Domat huet den F91 d'Revanche fir d'Néierlag aus dem leschte Joer an der Coupe de Luxembourg geholl.

An der 17. Minutt huet de Malget den F91 1:0 a Féierung bruecht: De Kruska hat e Corner vu lénks an d'Mëtt geschloen an de Malget de Ball an der Mëtt an de rietsen Eck gekäppt. An dës Féierung war och verdéngt, well Diddeleng war déi besser an dominant Ekipp. Vun Nidderkuer hat ee bis dohin nach net vill ze gesi krut.

Déi lescht 10 Minutte virun der Paus ass Nidderkuer awer ëmmer méi staark ginn, den Ausgläich louch an der Loft.

Trotzdeem goung et mat 1:0 an d'Paus. An den éischte 25 Minutte war Diddeleng dominant an d'Féierung war och verdéngt, mä dono huet Nidderkuer lues a lues opgedréint a konnt sech direkt e puer richteg gutt Golchancen erausspillen. Den Ausgläich hätte se sech verdéngt gehat, mä d'Gléck sollt net op hirer Säit sinn. D'Spectateuren hunn awer eng gutt éischt Hallschent ze gesi kritt.

Nidderkuer huet an der zweeter Hallschent do weidergemaach, wou een opgehal hat. Si ware weiderhin dominant, ma de Ball wollt net iwwert d'Linn ... Diddeleng stoung deen Ament zimlech defensiv an hunn net méi vill Offensivaktioune gehat.

An awer: An der 71. Minutt huet den Turpel den 2:0 geschoss! Äiskal hunn déi Diddelenger zouschloen. Op liicht riets kritt den Turpel de Ball op 16 Meter, zitt of a ka mat deem Schoss an de laangen Ech de Schinker iwwerwannen. Dëst war glécklech fir d'Heemekipp, wëll Nidderkuer war bis dohin an der 2. Hallschent kloer besser.

Ma an der 78. Minutt huet deeselwechten Turpel du fir den 3:0 gesuergt. Den Turpel krut eng schéi Pass vum Sinani an d'Spëtzt gespillt. Eleng virum Schinker blouf den Nationalspiller cool, Resultat: 3:0.

Dës 2 Goler koumen dann awer zimlech iwwerraschend a ware géint de Spillverlaf. Bannent 9 Minutten hat den Turpel de Match entscheet.

An der 89. konnt den De Almeida zwar nach op 1:3 verkierzen, geännert huet dat awer weder eppes fir den F91, nach eppes fir de Progrès ... Aus ronn 15 Meter konnt den De Almeida mat riets flaach an de laangen Eck schéissen. Verdéngt war den Éieregol allemol.

Um Enn gewënnt Diddeleng vum Resultat hier ganz souverän, mä d'Resultat gëtt de Match am Fong geholl awer net zeréck. Nidderkuer hat no enger net sou gudder Ufanksphas gudde Futtball gespillt an alles probéiert, mä mat 3 Mol Potto oder Lat sollt d'Gléck net op hirer Säit sinn. Diddeleng ass bei senge Chancen an der 2. Hallschent äiskal bliwwen a konnt domadder de Match entscheeden. Vun enger verdéngter Victoire kann een awer net onbedéngt schwätzen. 395 Spectateure ware live derbäi.

Diddeleng-Nidderkuer / © Bob Leven

An der Finall kämpfen also Diddeleng an d'Etzella ëm d'Coupe!