Eng wichteg Victoire gouf et e Sonndeg fir den AC Mailand. Si spillen déi nächst Saison sécher europäesch. An Däitschland klëmmt Paderborn an d'Bundesliga.

Um Sonndeg war net nëmmen zu Lëtzebuerg dee leschte Spilldag am Futtball-Championnat. Och an der 2. Däitscher Bundesliga, a Spuenien an der Tierkei ass de Ball fir dës Saison déi leschte Kéier gerullt. An Italien war et deen zweetleschte Spilldag.

Serie A

Chievo Verona - Sampdoria Genua 0:0

Kee Gol gouf et um leschte Spilldag am Championnat tëscht Chievo Verona a Smapdoria Genua. Verona huet dee Punkt zum Schluss och näischt méi gehollef. Si ginn um Enn déi lescht a Spillen d'nächst Joer an der Serie B.

AC Mailand - Frosinone Calcio 2:0

Wichteg dräi Punkte gouf et um zweetleschte Spilldag fir den AC Mailand. Si hu sech duerch Goler vum Piatek an der 57. Minutt an dem Suso an der 66. Minutt mat 2:0 géint Frosinone Calcio duerchgesat. Duerch d'Defaite vum FC Turin spillt den AC elo déi nächst Saison sécher europäesch. Nach ass awer vun der Champions League, der Europa League bis bei d'Qualifikatioun vun der Europa League alles méiglech.

Empoli - FC Turin 4:1

Juventus Turin - Atalanta Bergamo 1:1

Neapel - Inter Mailand 4:1

2. Bundesliga

An der zweeter Däitscher Bundesliga gouf um leschte Spilldag nach deen zweeten Opsteiger nieft Köln an de Veräin op der Barrageplaz gesicht.

Um Enn ka sech Paderborn freeën, well si trotz enger 1:3-Defaite géint Dresden den Opstig gepackt hunn. Déi Paderborner hunn dobäi vum 2:2-Remis tëscht Bochum an Union Berlin profitéiert. Berlin kënnt um Enn och op 57 Punkten, ma huet méi ee schlecht Golverhältnis a muss doduerch géint Stuttgart an der Relegatioun untrieden.

Ënnen of an der Tabell do stounge Magdeburg an Duisburg schonn als Ofsteiger fest. Ingolstadt kann nach hoffen. Si kréien et an der Relegatioun mat Wehen Wiesbaden ze dinn.

Championnat Tierkei

An der Tierkei war et bis déi lescht Sekonn um leschte Spilldag spannend. Dat bessert Enn hat awer Galatasaray Istanbul. Si konnte sech am direkten Duell géint Basaksehir mat 2:1 behaapten.

Fir Galatasaray ass et deen 22. Titel an der Veräinsgeschicht.

La Liga

Real Madrid - Betis Sevilla 0:2

Fir de Kont vum leschte Spilldag am spuenesche Championnat huet Real Madrid mat 0:2 géint Betis Sevilla verluer. D'Goler hunn de Loren an der 61. Minutt an de Jese an der 75. Minutt geschoss. Real Madrid kënnt um Enn am Championnat op déi 3. Plaz, dat hannert dem Champion Barcelona an Atlético Madrid. Betis Sevilla ginn déi 10.

Eibar - FC Barcelona 2:2

De spuenesche Champion huet sech um Enn vun der Saison auswäerts misse mat engem Punkt géint Eibar zefridde ginn. De Cucurella hat d'Lokalekipp an der 20. Minutt mat 1:0 a Féierung bruecht. Duerno konnt Barcelona duerch zwee Goler vum Messi an der 31. an 32. Minutt dréien a mat 2:1 a Féierung goen. Virun der Paus huet dunn Eibar awer nach emol zougeschloen an esou huet den de Blasis an der 45. Minutt op 2.2 gesat. Bis zum Schluss sollt kenger Ekipp méi ee Gol geléngen.

Den Iwwerbléck: Barcelona, Atlético Madrid, Real Madrid a Valencia hu sech fir d'Champions League qualifizéiert. Getafe spillt Europa League a Sevilla an Espanyol Barcelona spillen d'Qualifikatioun an der Europa League. Girona, Huesca a Rayo Vallecano steigen of.