E Sonndeg de Moien huet sech ee groussen Deel vun der Lëtzebuerger Delegatioun mat engem Charterfliger op de Wee a Richtung Montenegro gemaach.

AUDIO: Lëtzebuerger bei de JPEE / Reportage Serge Olmo

Nodeems d'Dëschtennis- an d'Judo-Delegatioun schonn e Samschdeg vun Düsseldorf aus a Montenegro geflu sinn, huet sech e Sonndeg de Moie fréi e weidere groussen Deel vum Team Lëtzebuerg mat engem Charterfliger vum Findel aus op de Wee gemaach.

140 Sportler sinn dëst Joer mat dobäi. D'Stëmmung virum Depart war gutt bei Athleten an hire Begleeder.

AUDIO: Reaktioune vu Lëtzebuerger Sportler

Duerch e Retard vun 2 an eng hallef Stonne sinn d'Sportler aus dem Grand-Duché eréischt e Sonndeg de Mëtteg um 12.45 Auer zu Tivat a Montenegro gelant. Vun do aus goung et du fir d'Sportler a Richtung Budva, wou d'Hoteller vun all de Sportler sinn.

D'Volleyball-Nationalekipp vun den Hären ass schonn zanter enger Woch zu Podgorica a Montenegro an huet sech mat engem leschten Trainingslager op d'Kompetitioun preparéiert.

140 Sportler a Sportlerinnen aus dem Grand-Duché si bei der 18. Editioun vun de Spiller vun de klenge Länner mat dobäi. E Méindeg den Owend ass zu Budva déi feierlech Erëffnungszeremonie. D'Kompetitioune fänken dann en Dënschdeg un an da gëtt bis e Samschdeg ëm Medaile gekämpft.

Déi lescht Editioun a San Marino war ee Rekordjoer fir Lëtzebuerg. Mat 38 Goldmedaile stoung een um Enn op der 1. Plaz am Medaile-Spigel. Déi éischte Kéier am Ausland. Et däerf ee gespaant sinn, wéi sech d'Team Lëtzebuerg dëst Joer wäert aus der Affär zéien.

Fir den Exploit vu virun 2 Joer ze widderhuelen, dierft alles anescht wéi einfach ginn. E Grond ass, datt Montenegro wuel mat enger staarker Ekipp wäert vertruede sinn, sou de Chef de Mission adjoint Ralf Lentz.

Virun allem am Volleyball an am Basket spillen d'Montenegriner op engem héijen europäeschen Niveau an dierfte sech am Normalfall hei d'Goldmedaile sécheren.