An der Liichtathletik huet dogéint d'Elodie Tshilumba eng sécher gegleefte Medail verpasst, si huet sech wärend der Kompetitioun blesséiert.

AUDIO: JPEE 2. Dag / Reportage Lynn Kayser

Am Bommstoussen huet sech de Bob Bertmes am Ufank vun der Kompetitioun schwéier gedoen an ass mat zwee Feelversich gestart. De Lëtzebuerger ass dunn awer vu Versuch zu Versuch besser mam Reen an deem naasse Rank eens ginn a konnt sech ëmmer weider steigeren. Säi stäerkste Versuch goung 20 Meter a 57 Zentimeter wäit, wat Gold bedeit huet.

Iwwer 800 Meter huet sech d'Charline Mathias an enger taktescher Course d'Goldmedail geséchert an domadder hir Plaz vu virun zwee Joer verdeedegt. Sëlwer war hei fir d'Vera Hoffmann.

Bei den Hären hunn de Josh Pütz an de Luca Bonamino de Podium verpasst. Si gi 4 a 5.

Déi drëtt Goldmedail vum Dag fir d'Team Lëtzebuerger an der Liichtathletik war fir d'Noémie Pleimling. Si huet mam Speer gewonnen an dat mat 51 Meter a 25 Zentimeter.

De François Grailet krut am Wäitsprong eng Sëlwermedail iwwerreecht. Mat 7 Meter a 37 Zentimeter huet hie Gold ëm nëmmen 1 Zentimeter verpasst.

Am Stafhéichsprong konnte sech zwou Lëtzebuergerinne freeën. Fir d'Silvia Amabilino gouf et Sëlwer. D'Lara Buekens Drëtt ginn. Déi dräi Athletinnen um Podium sinn 3,60 Meter gesprongen, d'Feelversich hunn hei also d'Decisioun bruecht. Well nëmmen 3 Dammen um Depart waren, gouf keng Bronzmedail verdeelt.

An der Course iwwer 100 Meter huet d'Anaïs Bauer e Mëttwoch den Owend eng Bronzmedail ëm den Hals hänken. D'Lëtzebuergerin ass eng Zäit vun 11 Sekonnen an 92 Honnertstel gelaf a war 13 Honnertstel méi lues wéi d'Gewënnerin aus Island.

Bei den Hären ass een iwwer 100 Meter eidel ausgaangen. De Pol Bidaine huet mat 11 Sekonnen 04 de Podium ëm 6 Honnertstel verpasst. Fir den David Mbang Springer war et déi 6. Plaz.

Eng grouss Enttäuschung gouf et am Héichsprong bei den Dammen. D'Elodie Tshilumba huet sech nämlech wärend der Kompetitioun blesséiert, ass net iwwer 1,71 Meter erauskomm an ass ouni Medail bliwwen.

Iwwer 5000 Meter konnt de Pol Mellina seng Sëlwermedail vu virun 2 Joer an Island net verdeedegen. De Leefer vum Celtic ass net iwwert déi 7. Plaz erauskomm. De Bob Bertemes huet als 4. de Podium knapp verpasst.