Um drëtten a leschten Dag vun de Liichtathletik-Kompetitiounen hunn d'Lëtzebuerger nach emol fläisseg Medaile gesammelt.

Iwwer 110 Meter Hécken huet de François Grailet sech a 24 Sekonnen an 52 Honnertstel d'Goldmedail geséchert. E Mëttwoch hat hien am Wäitsprong Gold ëm nëmmen 1 Zentimeter verpasst.

Bei den Dammen huet d'Lara Marx iwwer 100 Meter Hecken Sëlwer gewonnen. Si ass eng Zäit vu 14 Sekonnen an 62 Honnertstel gelaf.

Am Speerwerfen konnt sech den Tom Reuter iwwer Sëlwer freeën. De Lëtzebuerger huet mat 72,90 Meter seng perséinlech Beschtleeschtung ëm 1 Meter an 1 Zentimeter verbessert. Den Tom Reuter hat virun zwee Joer a San Marino och schonn eng nei PB realiséiert a Sëlwer gewonnen.

D'Anaïs Bauer huet no hirer Bronzmedail iwwer 100 Meter eng weider iwwer 200 Meter geséchert. De Chrono ass no 24 Sekonnen an 53 Honnertstel stoe bliwwen.

Eng drëtte Plaz gouf et och fir de Charel Gaspar am Héichsprong, datt mat 2 Meter a 6 Zentimeter.

Ganz zum Schluss stounge bei de Liichtathlete wéi gewinnt d'Staffelen um Programm. Iwwer 4x100 Meter hu sech d'Damme Bronz geséchert. D'Häre sinn eidel aus gaangen, well ee Wiessel net geklappt huet.

An der 4x 400 Meter Staffel gouf et Sëlwer fir d'Dammen. Bei den Häre gouf et déi 4. Plaz.

Fir de Pol Mellina gouf et dës Kéier keng Medail. Iwwer 10.000 Meter war et fir hien déi 6. mat 32 Minutten 50 Sekonnen an 53 Honnertstel.

Nom Speer huet sech d'Noémie Pleimling haut mam Diskus versicht. Hei war d'Konkurrenz awer ze staark. Um Enn war et déi 6. Plaz mat 39,03 Meter.

Bilan an der Liichtathletik

D'Liichtathlete kënne sech no dräi erfollegräichen Deeg iwwert 19 Medaile freeën. Domadder huet een d'Zil vun 20 Medaile ganz knapp verpasst.

Wat d'Goldmedailen ugeet, huet een d'Zil vu 5 iwwertraff et goufen der nämlech 6. 8 waren der aus Sëlwer a 5 aus Bronz.

Am erfollegräichste war d'Vera Hoffmann mat Gold iwwer 1500 Meter, an zweemol Sëlwer iwwer 800 Meter a mat der 4X400 Meter Staffel.

Donieft huet de Bob Bertemes mat sengen 20 Meter a 57 Zentimeter och de Rekord vun de Spiller vun de klenge Länner verbessert.